Get the latest news at
your fingertips!
Download our app now
LIVE TV
Search
ആരാധകരും പ്രേക്ഷകരും ഒരുപോലെ കാത്തിരിക്കുന്ന മമ്മൂട്ടി ചിത്രമാണ് കളങ്കാവൽ. ഒരു നീണ്ട ഇടവേളയ്ക്ക് ശേഷം മമ്മൂട്ടിയുടേതായി തിയേറ്ററുകളിൽ എത്തുന്ന ഈ ചിത്രത്തിന് ഒരുപാട് പ്രതീക്ഷയാണ് ഉള്ളത്. വിനായകനും മമ്മൂട്ടിയും പ്രധാന വേഷങ്ങളിൽ എത്തുന്നു എന്ന വാർത്ത വന്നപ്പോൾ മുതൽ ആരാധകർ ചോദിക്കുന്ന ഒരു ചോദ്യമുണ്ട് ആരാണ് കഥയിലെ വില്ലൻ എന്ന്, മമ്മൂട്ടിയാകും എന്നാണ് പ്രേക്ഷകരുടെ പ്രതീക്ഷ. എന്നാൽ അണിയറപ്രവർത്തകർ ഇതുവരെ അതുമായി ബന്ധപ്പെട്ട ഒരു സൂചനയും പങ്കുവെച്ചിട്ടില്ല. സിനിമയുടെ പ്രമോഷനുമായി ബന്ധപ്പെട്ട് മമ്മൂട്ടി കമ്പനിയ്ക്ക് നൽകിയ അഭിമുഖത്തിൽ സംസാരിക്കാൻ ഒരുങ്ങുകയാണ് നടൻ.
ഏറെനാളായി നടന്റെ അഭിമുഖം കാണാൻ കാത്തിരിക്കുന്ന ആരാധകർക്ക് സന്തോഷമാണ് ഈ വാർത്ത. വിനായകന്റെ ഇന്റർവ്യൂവിന്റെ അവസാന ഭാഗത്തിലാണ് മമ്മൂട്ടിയുടെ അഭിമുഖം വരുന്നതിന്റെ വിവരം പങ്കുവെച്ചിരിക്കുന്നത്. നായകനോടാണോ വില്ലനോടാണോ താൻ സംസാരിക്കുന്നത് എന്ന അവതാരകയുടെ ചോദ്യത്തിന് നിങ്ങൾ ഒരു നടനോടാണ് സംസാരിക്കുന്നതെന്നാണ് മമ്മൂട്ടി മറുപടി നൽകുന്നത്. ഈ ഭാഗം ഇപ്പോൾ സോഷ്യൽ മീഡിയയിൽ വൈറലാണ്.
'കഥ ഉണ്ടാക്കുമ്പോഴും എഴുതുമ്പോഴും എന്നെ മനസിൽ കണ്ട് കൊണ്ട് എഴുതരുതെന്ന് മമ്മൂട്ടി പറഞ്ഞു. നമ്മുടെ ജീവിതം മര്യാദയ്ക്ക് പോകുന്നതിന്റെ ഒരു കാരണം തന്നെ നന്മയും തിന്മയും തമ്മിലുള്ള യുദ്ധത്തിൽ, നന്മ ജയിക്കുന്നത് കൊണ്ടാണ് നമ്മൾ നല്ല മനുഷ്യനാകുന്നതെന്നും മമ്മൂട്ടി കൂട്ടിച്ചേർത്തു.
കളങ്കാവൽ നേരത്തെ നവംബർ 27 നായിരുന്നു പുറത്തിറങ്ങാനിരുന്നത്. എന്നാൽ ചില കാരണങ്ങളാൽ സിനിമയുടെ റിലീസ് മാറ്റിവെച്ചിരുന്നു. ചിത്രം ഡിസംബർ അഞ്ചിന് പുറത്തിറങ്ങും. ഒരു ഗംഭീര ക്രൈം ആക്ഷൻ ത്രില്ലർ ചിത്രമായിരിക്കും കളങ്കാവൽ എന്നാണ് ട്രെയ്‌ലർ നൽകിയ സൂചന. ജിഷ്ണു ശ്രീകുമാറും ജിതിൻ കെ ജോസും ചേർന്ന് തിരക്കഥ രചിച്ച കളങ്കാവൽ മമ്മൂട്ടി കമ്പനിയുടെ ബാനറിൽ നിർമ്മിക്കുന്ന ഏഴാമത്തെ ചിത്രമാണ്.
Content Highlights: After a long wait, Mammootty's interview is coming for fans
