LIVE TV
നിങ്ങളുടെ പോളിസി എടുക്കാനും ക്ലെയിം ചെയ്യാനും ഇനി ഓഫീസുകൾ കയറിയിറങ്ങേണ്ട. ഇൻഷുറൻസ് മേഖലയിൽ അടിമുടി മാറ്റങ്ങളുമായി ഐആർഡിഎഐ വരുന്നു.
ഇന്ത്യയിലെ ഇൻഷുറൻസ് നിയന്ത്രണ ഏജൻസിയായ ഐആർഡിഎഐ അടുത്ത 4 മുതൽ 6 മാസത്തിനുള്ളിൽ ഇൻഷുറൻസ് മേഖലയിൽ പത്തോളം വലിയ മാറ്റങ്ങൾ കൊണ്ടുവരാൻ ഒരുങ്ങുന്നു. സാധാരണക്കാർക്ക് ഇൻഷുറൻസ് സേവനങ്ങൾ കൂടുതൽ വേഗത്തിലും സുതാര്യമായും ലഭ്യമാക്കുകയാണ് ഈ പരിഷ്കാരങ്ങളുടെ ലക്ഷ്യം.
ഇൻഷുറൻസ് ഇ-മാർക്കറ്റ് പ്ലേസ്
ഇൻഷുറൻസ് ഇ-മാർക്കറ്റ് പ്ലേസ് എന്നത് ലളിതമായി പറഞ്ഞാൽ ഇൻഷുറൻസ് പോളിസികൾക്ക് മാത്രമായുള്ള ഒരു 'ആമസോൺ' അല്ലെങ്കിൽ 'ഫ്ലിപ്കാർട്ട്' പോലെ ഒന്നാണെന്ന് പറയാം. സാധനങ്ങൾ ഓൺലൈനിൽ വാങ്ങുന്നതുപോലെ ഇൻഷുറൻസ് പോളിസികളും ഇനി ഒരു ഡിജിറ്റൽ പ്ലാറ്റ്ഫോം വഴി എളുപ്പത്തിൽ തിരഞ്ഞെടുക്കാം. വിവിധ കമ്പനികളുടെ പോളിസികൾ താരതമ്യം ചെയ്യാനും അവിടെത്തന്നെ പണമടയ്ക്കാനും ഇത് സഹായിക്കും. നിലവിൽ ഒരു ഇൻഷുറൻസ് എടുക്കണമെങ്കിൽ ഓരോ കമ്പനിയുടെയും വെബ്സൈറ്റിൽ പോകണം അല്ലെങ്കിൽ ഏജന്റിനെ വിളിക്കണം. എന്നാൽ ഈ പുതിയ ഡിജിറ്റൽ പ്ലാറ്റ്ഫോം വരുന്നതോടെ, ഇന്ത്യയിലെ എല്ലാ ഇൻഷുറൻസ് കമ്പനികളെയും അവരുടെ പോളിസികളെയും ഒരേ സ്ഥലത്ത് കാണാൻ കഴിയും.
താരതമ്യം ചെയ്യാം, ലാഭിക്കാം
വിവിധ കമ്പനികളുടെ ഹെൽത്ത് ഇൻഷുറൻസോ ലൈഫ് ഇൻഷുറൻസോ തമ്മിൽ വിലയിലും ഗുണങ്ങളിലും ഉള്ള വ്യത്യാസം നേരിട്ട് താരതമ്യം ചെയ്യാം. നിങ്ങളുടെ ബജറ്റിന് അനുയോജ്യമായ ഏറ്റവും മികച്ച പോളിസി ആരുടെയും നിർബന്ധത്തിന് വഴങ്ങാതെ സ്വയം തിരഞ്ഞെടുക്കാം. ഈ പ്ലാറ്റ്ഫോമിൽ നിങ്ങളുടെ രേഖകൾ ഒരിക്കൽ അപ്ലോഡ് ചെയ്താൽ മതിയാകും. പുതിയ പോളിസി എടുക്കുമ്പോഴോ പഴയത് പുതുക്കുമ്പോഴോ ഓരോ തവണയും രേഖകൾ നൽകേണ്ടി വരില്ല.
ക്ലെയിം ചെയ്യാനും എളുപ്പം
പോളിസി എടുക്കാൻ മാത്രമല്ല, പിന്നീട് ആശുപത്രി ചെലവുകൾക്കോ മറ്റോ പണം തിരികെ ലഭിക്കാനും ഈ പ്ലാറ്റ്ഫോം വഴി സാധിക്കും. ഏത് കമ്പനിയുടെ പോളിസി ആണെങ്കിലും ഈ ഒരൊറ്റ വഴിയിലൂടെ കാര്യങ്ങൾ വേഗത്തിലാക്കാം.ഇതൊരു സർക്കാർ ഏജൻസി നേരിട്ട് നടത്തുന്ന സംവിധാനമായതുകൊണ്ട് തട്ടിപ്പുകൾക്ക് സാധ്യത കുറവാണ്. നിങ്ങളുടെ പണവും വിവരങ്ങളും സുരക്ഷിതമായിരിക്കും. പുതിയ സാങ്കേതികവിദ്യകൾ ഉപയോഗിക്കുന്നതിലൂടെ പോളിസി ക്ലെയിമുകൾ തീർപ്പാക്കുന്നതും മറ്റും കൂടുതൽ വേഗത്തിലാകും.
ഇൻഷുറൻസ് പോളിസികൾ സാധാരണക്കാരിലേക്ക് എത്തിക്കുന്ന രീതിയിൽ വലിയ മാറ്റങ്ങൾ വരും. ഏജന്റുമാർ വഴിയോ ബാങ്കുകൾ വഴിയോ മാത്രമല്ല, ഡിജിറ്റൽ സംവിധാനങ്ങൾ വഴി കൂടുതൽ സുതാര്യമായി പോളിസികൾ ലഭ്യമാകും.
ഉപഭോക്താക്കൾക്ക് എന്ത് ഗുണം?
ഇൻഷുറൻസ് എടുക്കുന്നതിലെ സങ്കീർണ്ണതകൾ ഒഴിവാക്കി സാധാരണക്കാർക്ക് അത് പ്രാപ്യമാക്കുക എന്നതാണ് ഇതിന്റെ പ്രധാന നേട്ടം. ഡിജിറ്റൽ വിപ്ലവത്തിന്റെ ഭാഗമായി ഇൻഷുറൻസ് മേഖലയിലും കാര്യങ്ങൾ കൂടുതൽ വിരൽത്തുമ്പിലാകും. പുതിയ ഡിജിറ്റൽ സംവിധാനങ്ങൾ വരുന്നതോടെ, ആശുപത്രി ബില്ലുകൾ കൈമാറുന്നതും ഇൻഷുറൻസ് കമ്പനികൾ അത് പരിശോധിച്ച് പണം അനുവദിക്കുന്നതും കൂടുതൽ വേഗത്തിലാകും. നിലവിൽ ക്ലെയിം ലഭിക്കാൻ നേരിടേണ്ടി വരുന്ന കാലതാമസം ഗണ്യമായി കുറയും.
പോളിസികൾ ഡിജിറ്റലായി സൂക്ഷിക്കാം
നിങ്ങളുടെ എല്ലാ ഇൻഷുറൻസ് പോളിസികളും (ലൈഫ്, ഹെൽത്ത്, മോട്ടോർ) ഒരു 'ഇലക്ട്രോണിക് ഇൻഷുറൻസ് അക്കൗണ്ടിൽ' (EIA) സൂക്ഷിക്കാൻ സാധിക്കും. ഇനി മുതൽ പേപ്പർ രേഖകൾ നഷ്ടപ്പെടുമെന്ന പേടി വേണ്ട. ഒരു ക്ലിിക്കിലൂടെ എല്ലാ വിവരങ്ങളും ലഭ്യമാകും.
പ്രീമിയം തുകയിൽ മാറ്റം വരാം
ഇൻഷുറൻസ് വിതരണ ശൃംഖലയിലും പ്രവർത്തന രീതിയിലും വരുത്തുന്ന മാറ്റങ്ങൾ കമ്പനികളുടെ ചിലവ് കുറയ്ക്കാൻ സഹായിക്കും. ഇതിന്റെ ഗുണം ഉപഭോക്താക്കൾക്ക് ലഭിക്കുകയാണെങ്കിൽ, ഭാവിയിൽ പ്രീമിയം തുകയിൽ നേരിയ കുറവുണ്ടായേക്കാം.
പോളിസി മാറ്റുന്നത് എളുപ്പമാകും
ഒരു കമ്പനിയുടെ സേവനത്തിൽ തൃപ്തരല്ലെങ്കിൽ, നിങ്ങളുടെ നിലവിലുള്ള ആനുകൂല്യങ്ങൾ നഷ്ടപ്പെടാതെ തന്നെ മറ്റൊരു കമ്പനിയിലേക്ക് മാറുന്നത് കൂടുതൽ എളുപ്പമാക്കാൻ പുതിയ പരിഷ്കാരങ്ങൾ ലക്ഷ്യമിടുന്നു.പോളിസി നിബന്ധനകൾ ലളിതമായ ഭാഷയിൽ ലഭ്യമാക്കാൻ കമ്പനികൾക്ക് നിർദ്ദേശം ലഭിക്കും. ഇത് സാധാരണക്കാർക്ക് തങ്ങൾ എന്തിനാണ് പണം നൽകുന്നത് എന്ന് വ്യക്തമായി മനസ്സിലാക്കാൻ സഹായിക്കും.
ചുരുക്കത്തിൽ നിങ്ങളുടെ നിലവിലുള്ള പോളിസികൾ റദ്ദാകില്ല, മറിച്ച് അവയുമായി ബന്ധപ്പെട്ട സേവനങ്ങൾ കൂടുതൽ മെച്ചപ്പെടുകയാണ് ചെയ്യുന്നത്. മുൻകാലങ്ങളെ അപേക്ഷിച്ച് ഇൻഷുറൻസ് പ്രീമിയം കുറയാനും വഴിയൊരുങ്ങും.
Content Highlights: No more running from office to office to buy a policy or file a claim. IRDAI is set to introduce sweeping reforms in the insurance sector.
