'സോണിയാ ഗാന്ധി നയിക്കുന്ന പാർട്ടിയല്ലേ അത്?എങ്ങനെയാണ് അവരുടെ നേതാക്കൾക്ക് ഈ ഹീനകൃത്യം ന്യായീകരിക്കാനാവുന്നത്'

തിരുവനന്തപുരം: രാഹുല്‍ മാങ്കൂട്ടത്തില്‍ എംഎല്‍എയ്‌ക്കെതിരെ യുവതി പരാതി നല്‍കിയ സംഭവത്തില്‍ കോണ്‍ഗ്രസ് നേതാക്കളുടെ നിലപാട് അത്ഭുതപ്പെടുത്തുന്നതാണെന്ന് സിപിഐഎം കേന്ദ്ര കമ്മിറ്റി അംഗം ഇ പി ജയരാജന്‍. ഇത്രയും ക്രൂരമായ സംഭവമുണ്ടായാല്‍ എങ്ങനെയാണ് കോണ്‍ഗ്രസില്‍ രണ്ട് അഭിപ്രായമുണ്ടാവുകയെന്ന് അദ്ദേഹം ചോദിച്ചു. ഇത്തരം സംഭവങ്ങളെയൊക്കെ അംഗീകരിക്കുന്ന പാര്‍ട്ടിയായി കോണ്‍ഗ്രസ് അധഃപതിച്ചിരിക്കുകയാണെന്നും പാര്‍ട്ടി സര്‍വനാശത്തിലേക്കാണെന്നും ഇ പി ജയരാജന്‍ പറഞ്ഞു. മാധ്യമങ്ങളോട് പ്രതികരിക്കുകയായിരുന്നു അദ്ദേഹം.

'ഗര്‍ഭഛിദ്രത്തിന് മാരകമായ മരുന്നുകള്‍ ഉപയോഗിക്കുക, ഭീഷണിപ്പെടുത്തല്‍… എത്രമാത്രം ഞെട്ടിപ്പിക്കുന്ന കാര്യങ്ങളാണത്. ഇങ്ങനൊരു സംഭവമുണ്ടായാല്‍ എങ്ങനെയാണ് കോണ്‍ഗ്രസില്‍ രണ്ട് അഭിപ്രായങ്ങളുണ്ടാവുക? ആരെയും അത്ഭുതപ്പെടുത്തുന്നതാണത്. കോണ്‍ഗ്രസ് സര്‍വനാശത്തിലേക്കാണ്. കോണ്‍ഗ്രസ് തകര്‍ന്നുകൊണ്ടിരിക്കുകയാണ്. ഇത്തരം സംഭവങ്ങളെയൊക്കെ അംഗീകരിക്കുന്ന പാര്‍ട്ടിയായി കോണ്‍ഗ്രസ് അധഃപ്പതിച്ചിരിക്കുകയാണ്. സോണിയാ ഗാന്ധി നയിക്കുന്ന ഒരു പാര്‍ട്ടിയല്ലേ അത്? എങ്ങനെയാണ് ഇത്തരമൊരു ഹീനകൃത്യത്തെ ന്യായീകരിക്കാന്‍ കുറേ നേതാക്കള്‍ക്ക് കഴിയുന്നത്? കോണ്‍ഗ്രസ് കേരളത്തില്‍ നശിക്കുകയാണ്. ആ നാശം അതിവേഗത്തിലുണ്ടാകും. രാഹുലിനെ പിന്തുണയ്ക്കുന്ന നേതാക്കള്‍ ആലോചിക്കേണ്ട കാര്യം അവര്‍ക്ക് പെണ്‍മക്കളില്ലേ? ഭാര്യമാരില്ലേ? ഈ സംസ്‌കാരത്തെ പ്രോത്സാഹിപ്പിക്കാന്‍ പറ്റുമോ? രാഷ്ട്രീയത്തെ തന്നെ അങ്ങേയറ്റം പരിഹസിക്കുകയല്ലേ? ജനങ്ങള്‍ക്ക് രാഷ്ട്രീയത്തോടുളള വിശ്വാസത്തെപ്പോലും കളങ്കപ്പെടുത്തുകയാണ്': ഇ പി ജയരാജന്‍ പറഞ്ഞു.

കോണ്‍ഗ്രസ് ക്രൈം സിന്‍ഡിക്കേറ്റിന്റെ പിടിയിലാണെന്ന് എ എ റഹീം എംപിയും പ്രതികരിച്ചിരുന്നു. യുവ നേതാക്കളാണ് ഈ സിന്‍ഡിക്കേറ്റില്‍ ഉളളതെന്നും പണവും അധികാരവുമുളള അവരെ കോണ്‍ഗ്രസിലെ സീനിയര്‍ നേതാക്കള്‍ക്ക് പോലും ഭയമാണെന്നും എ എ റഹീം പറഞ്ഞു. 'ആ ക്രൈം സിന്‍ഡിക്കേറ്റിന്റെ നേതൃത്വത്തിലാണ് മുഴുവന്‍ പിആര്‍ വര്‍ക്കുകളും നടക്കുന്നത്. രാഹുല്‍ മാങ്കൂട്ടത്തിലിനെ ഇപ്പോള്‍ ഒളിവില്‍ സംരക്ഷിക്കുന്നതും അവരുടെ നേതൃത്വത്തിലാണ്. കര്‍ണാടകയിലെയും തെലങ്കാനയിലെയും അധികാരം പോലും അവര്‍ ഉപയോഗിക്കുന്നുണ്ട്. സ്വന്തം ബിസിനസുകളും അതിലൂടെ വളര്‍ത്തുന്നുണ്ട്': എന്നാണ് റഹീം പറഞ്ഞത്.

Content Highlights: EP Jayarajan against congress leaders supporting rahul mamkoottathil