ഡൽഹി: ഇന്ത്യയിൽ നടക്കുന്ന കായിക മാമാങ്കത്തിൽ മത്സരിക്കണമെന്ന ആ​ഗ്രഹവുമായി ജാവലിൻ താരം നീരജ് ചോപ്ര. ഇന്ത്യൻ എക്സപ്രസിന് നൽകിയ അഭിമുഖത്തിലാണ് താരം തന്റെ ആ​ഗ്രഹം വെളിപ്പെടുത്തിയത്. ഇന്ത്യ അന്താരാഷ്ട്ര കായിക മാമാങ്കത്തിന് വേദിയാകണം. ഇന്ത്യൻ അത്‌ലറ്റിക് ഫെഡറേഷൻ ഇതിനായി ശ്രമിക്കുന്നുണ്ട്. ഒരു കായിക മാമാങ്കത്തിന് ഇന്ത്യ വേദിയാകുന്നതിനായി കാത്തിരിക്കുകയാണെന്നും നീരജ് ചോപ്ര പ്രതികരിച്ചു.

ഏഷ്യൻ ​ഗെയിംസിലെ വിവാദ ത്രോയിലും നീരജ് പ്രതികരിച്ചു. നീരജിന്റെ 90 മീറ്റർ എന്ന് കരുതുന്ന ആദ്യ ത്രോ റദ്ദാക്കപ്പെട്ടിരുന്നു. എന്നാൽ അത് 90 മീറ്റർ എത്തിയിട്ടില്ലെന്ന് നീരജ് വ്യക്തമാക്കി. അത് 88 മീറ്ററിന് മുകളിൽ ദൂരം എത്തിയിരുന്നതായും നീരജ് പറഞ്ഞു.

ഏഷ്യൻ ​ഗെയിംസിൽ ഇന്ത്യയുടെ ​സുവർണ മെഡൽ നേട്ടക്കാരനാണ് നീരജ് ചോപ്ര. തൊട്ടുമുമ്പ് ലോക അത്‌ലറ്റിക് ചാമ്പ്യൻഷിപ്പിലും നീരജിനായിരുന്നു സ്വർണം. ഇന്ത്യയ്ക്കായി ജാവലിൻ ത്രോയിൽ ഒളിമ്പിക്സ് സ്വർണം നേടിയ താരമാണ് നീരജ് ചോപ്ര.