ലണ്ടൻ: ഇംഗ്ലീഷ് പ്രീമിയർ ലീഗിൽ ലിവർപൂളിനെ അട്ടിമറിച്ച് ക്രിസ്റ്റൽ പാലസ്. എതിരില്ലാത്ത ഒരു ഗോളിനാണ് യർഗൻ ക്ലോപ്പിന്റെ സംഘം പരാജയപ്പെട്ടത്. ഇംഗ്ലീഷ് പ്രീമിയർ ലീഗിന്റെ കിരീടത്തിനായി ശക്തമായ മത്സരം നടക്കുമ്പോഴുള്ള തോൽവി ലിവർപൂളിന് കനത്ത തിരിച്ചടിയാണ്. 14-ാം മിനിറ്റിൽ എബെറെച്ചി ഈസിന്റെ ഗോൾ ക്രിസ്റ്റൽ പാലസിന് വിജയമൊരുക്കി.
ദിവസങ്ങൾക്ക് മുമ്പ് നടന്ന യുവേഫ യൂറോപ്പ ലീഗ് ക്വാർട്ടർ ഫൈനലിൽ അറ്റലാന്റ ബി സിയോടും ലിവർപൂൾ അട്ടിമറി വഴങ്ങിയിരുന്നു. ഈ മത്സരത്തിൽ 14 മാസത്തിന് ശേഷമാണ് ആൻഫീൽഡ് സ്റ്റേഡിയത്തിൽ ലിവർപൂൾ തോൽവി വഴങ്ങുന്നത്. ഇംഗ്ലീഷ് പ്രീമിയർ ലീഗ് സീസണിൽ ആദ്യമായാണ് ആൻഫീൽഡ് സ്റ്റേഡിയത്തിൽ ലിവർപൂൾ തോൽവി വഴങ്ങുന്നത്.
പ്രീമിയർ ലീഗ് പോയിന്റ് ടേബിളിൽ 32 മത്സരങ്ങൾ പൂർത്തിയായപ്പോൾ 73 പോയിന്റുമായി മാഞ്ചസ്റ്റർ സിറ്റിയാണ് ഒന്നാമത്. ആഴ്സണൽ 72 പോയിന്റുമായി രണ്ടാമതും ലിവർപൂൾ 71 പോയിന്റോടെ മൂന്നാം സ്ഥാനത്തുമുണ്ട്.