ഇന്ത്യൻ പ്രീമിയർ ലീഗിൽ ഓരോ മത്സരത്തിലും ബാറ്റിംഗ് വെടിക്കെട്ട് തുടരുകയാണ്. മിക്ക മത്സരങ്ങളിലും ടീം സ്കോർ 200ന് മുകളിലേക്കെത്തുന്നു. ബൗളർമാരെ അവഗണിച്ചുള്ള പിച്ചുകൾക്കെതിരെ വിമർശനങ്ങൾ ഇതിനോടകം ശക്തമാണ്. ഇപ്പോൾ നെതർലാൻഡ്സ് മുൻ താരം റയാൻ ടെൻ ഡോഷെയും ഐപിഎല്ലിലെ ബാറ്റിംഗ് വിസ്ഫോടനത്തെ വിമർശിച്ച് രംഗത്തെത്തി.
ഐപിഎല്ലിൽ ബാറ്റിംഗ് വെടിക്കെട്ട് എല്ലാ മത്സരങ്ങളിലും കാണുന്നു. ബാറ്റർമാർക്ക് അനുകൂലമായ ഈ രീതിയിൽ നിന്ന് പിന്മാറാൻ അധികൃതർ തയ്യാറാകണം. ഇപ്പോഴത്തെ രീതിയിൽ നിന്ന് പിന്മാറിയില്ലെങ്കിൽ അത് ഒരു പുതിയ സംസ്കാരം സൃഷ്ടിക്കും. ഭാവിയിൽ ഐപിഎൽ ബൗളർമാരുടെ കഴിവുകൾ നശിപ്പിക്കുന്നതാവുമെന്നും നെതർലാൻഡ്സ് മുൻ താരം പ്രതികരിച്ചു.
കൊൽക്കത്ത നൈറ്റ് റൈഡേഴ്സിന്റെ സഹപരിശീലകൻ കൂടിയാണ് ടെൻ ഡോഷെ. കഴിഞ്ഞ ദിവസം ഐപിഎല്ലിൽ പഞ്ചാബിനെതിരെ കൊൽക്കത്ത ആറ് വിക്കറ്റിന് 261 റൺസ് നേടിയിരുന്നു. എന്നാൽ രണ്ട് വിക്കറ്റ് മാത്രം നഷ്ടത്തിൽ പഞ്ചാബ് കിംഗ്സ് ആ ലക്ഷ്യം മറികടന്നു.