ജയ്പൂർ: ഇന്ത്യൻ പ്രീമിയർ ലീഗിൽ രാജസ്ഥാൻ റോയൽസിനോട് പരാജയപ്പെട്ടിരിക്കുകയാണ് മുംബൈ ഇന്ത്യൻസ്. ഒമ്പത് വിക്കറ്റിന്റെ കടുത്ത തോൽവിയാണ് മുംബൈ നേരിട്ടത്. പിന്നാലെ തോൽവിയിൽ പ്രതികരണവുമായി മുംബൈ നായകൻ ഹാർദ്ദിക്ക് പാണ്ഡ്യ രംഗത്തെത്തി. മുംബൈ ഇന്ത്യൻസ് ഇത്ര ഭേദപ്പെട്ട സ്കോറിൽ എത്തുമെന്ന് താൻ പ്രതീക്ഷിച്ചിരുന്നില്ലെന്ന് ഹാർദ്ദിക്ക് പറഞ്ഞു.
തുടക്കത്തിലെ വിക്കറ്റ് നഷ്ടമായത് മുംബൈയെ പ്രതിസന്ധിയിലാക്കി. തിലക് വർമ്മയും നെഹാല്‍ വധേരയും നന്നായി ബാറ്റ് ചെയ്തു. ഒരു ഘട്ടത്തിൽ 180 റൺസ് പോലും പ്രതീക്ഷിച്ചിരുന്നില്ല. 10-15 റൺസ് കുറവാണെന്ന് അറിഞ്ഞിരുന്നു. ബൗളിംഗിൽ പവർപ്ലേയിൽ തന്നെ കാര്യങ്ങൾ കൈവിട്ടുപോയി. ഫീൽഡിംഗ് പ്രകടനം മോശമായിരുന്നു. ഒടുവിൽ പരാജയപ്പെടുക മാത്രമാണ് ചെയ്യാനുണ്ടായിരുന്നതെന്നും ഹാർദ്ദിക്ക് പ്രതികരിച്ചു.
ഒരു താരത്തോടും താൻ വ്യക്തിപരമായി സംസാരിക്കാൻ ഉദ്ദേശിക്കുന്നില്ല. എല്ലാവരും മികച്ച കളിക്കാരാണ്. ഓരോത്തർക്കും അവരുടെ റോളുകൾ അറിയാം. തെറ്റുകളിൽ നിന്ന് താരങ്ങൾ പഠിക്കട്ടെ. അടുത്ത മത്സരത്തിൽ മികച്ച പ്രകടനം ആവശ്യമാണ്.. അതിനായി എല്ലാ താരങ്ങളും അവരവരുടെ തെറ്റുകൾ മനസിലാക്കണമെന്നും ഹാർദ്ദിക്ക് വ്യക്തമാക്കി.
