കൊൽക്കത്ത: ഇന്ത്യൻ പ്രീമിയർ ലീഗിൽ കൊൽക്കത്ത നൈറ്റ് റൈഡേഴ്സും റോയൽ ചലഞ്ചേഴ്സ് ബെംഗളൂരുവും വീണ്ടും നേർക്കുനേർ വരികയാണ്. നാളെ 3.30ന് കൊൽക്കത്തയുടെ തട്ടകത്തിലാണ് മത്സരം. ഇരുടീമുകളും ഈഡൻ ഗാർഡനിൽ പരിശീലനത്തിലാണ്. ഇതിനിടെ ഗൗതം ഗംഭീറും വിരാട് കോഹ്ലിയും തമ്മിലുള്ള ഒരു സംസാരമാണ് സമൂഹമാധ്യമങ്ങളിൽ തരംഗമാകുന്നത്.
ഇരുവരുടെയും സംഭാഷണ രംഗങ്ങൾ കൊൽക്കത്ത നൈറ്റ് റൈഡേഴ്സ് സമൂഹമാധ്യമങ്ങളിൽ പങ്കുവെച്ചു. ഇവർ തമ്മിൽ എന്താണ് സംസാരിക്കുന്നതെന്നാണ് സമൂഹമാധ്യമങ്ങളിലെ ചർച്ച. എന്തായാലും ഗംഭീറും കോഹ്ലിയും തമ്മിൽ വീണ്ടുമൊരു പ്രശ്നത്തിലേക്ക് അല്ലെന്നാണ് ഇതിൽ നിന്ന് കിട്ടുന്ന സൂചന.
ഏതാനും ദിവസങ്ങൾക്ക് മുമ്പ് ബെംഗളൂരുവിൽ വെച്ച് റോയൽ ചലഞ്ചേഴ്സ്-കൊൽക്കത്ത നൈറ്റ് റൈഡേഴ്സ് മത്സരം നടന്നിരുന്നു. ഈ മത്സരത്തിനിടെ 10 വർഷമായുള്ള ഗംഭീർ-കോഹ്ലി സൗന്ദര്യ പിണക്കത്തിന് അവസാനമായിരുന്നു. ഇതൊരിക്കൽ കൂടി ആവർത്തിക്കരുതെന്നാണ് ക്രിക്കറ്റ് ആരാധകർക്കിടയിലെ ആഗ്രഹം.