ജയ്പൂർ: ഐപിഎല്ലിൽ രാജസ്ഥാൻ റോയൽസിനെതിരെ നന്നായി കളിക്കുകയായിരുന്നു ശുഭ്മൻ ഗിൽ. ഒരുവശത്ത് വിക്കറ്റുകൾ വീഴുമ്പോഴും ഗുജറാത്തിന് പ്രതീക്ഷയായിരുന്നു ഗിൽ. എന്നാൽ ഗില്ലിനെ പുറത്താക്കാൻ സ്പിന്നർ യൂസ്വേന്ദ്ര ചഹൽ ഒരു തന്ത്രം പ്രയോഗിച്ചു. മലയാളി താരം സഞ്ജു സാംസണിന്റെ കിടിലൻ സ്റ്റമ്പിങ് കൂടിയായതോടെ ഗിൽ നിരാശയോടെ മടങ്ങി.
മത്സരത്തിന്റെ 16-ാം ഓവറിലായിരുന്നു സംഭവം. ചഹലിന്റെ ആദ്യ രണ്ട് പന്തും ഗിൽ ബൗണ്ടറി കടത്തി. ഇതോടെ താരം ഒരു തന്ത്രം പ്രയോഗിച്ചു. ഓഫ് സൈഡിൽ ഒരു വൈഡ് എറിയുക. ആ പന്തിൽ ഗിൽ സ്റ്റെപ് ഔട്ട് ചെയ്തു. പന്ത് സഞ്ജു സാംസണിന്റെ കൈകളിലെത്തി. സഞ്ജു ഗില്ലിനെ സ്റ്റമ്പ് ചെയ്ത് പുറത്താക്കി.
വിക്കറ്റ് ആഘോഷിക്കുമ്പോൾ ബുദ്ധികൊണ്ട് കളിക്കണമെന്ന് ചഹൽ ആംഗ്യം കാണിക്കുന്നുണ്ടായിരുന്നു. 44 പന്തിൽ 72 റൺസുമായാണ് ഗിൽ മടങ്ങിയത്. ആറ് ഫോറും രണ്ട് സിക്സും സഹിതമാണ് താരത്തിന്റെ ഇന്നിംഗ്സ്.
