ജയ്പൂർ: ഇന്ത്യൻ പ്രീമിയർ ലീഗ് സീസണിലെ മികച്ച ക്യാച്ചുകളിലൊന്ന് കൈപ്പിടിയിലാക്കി വിജയ് ശങ്കർ. മികച്ച ഇന്നിംഗ്സുമായി മുന്നോട്ട് നീങ്ങിയ റിയാൻ പരാഗിനെയാണ് വിജയ് ബൗണ്ടറിയിൽ പിടികൂടിയത്. മത്സരത്തിന്റെ 19-ാം ഓവറിലാണ് സീസണിലെ തന്നെ മികച്ച ക്യാച്ച് പിറന്നത്. മോഹിതിന്റെ സ്ലോവർ ബൗൺസർ പരാഗ് അടിച്ചകറ്റി.
സ്ട്രൈറ്റ് ലോങ് ഓഫിലായിരുന്ന ശങ്കർ പന്ത് പിടിച്ചുവെങ്കിലും ബൗണ്ടറിക്ക് തൊട്ടരികിലായിരുന്നു. സിക്സ് വിടാതിരിക്കാൻ ഏറെ പ്രയാസപ്പെട്ട താരം പന്ത് അന്തരീക്ഷത്തിലേക്ക് എറിഞ്ഞു. ബൗണ്ടറിയിൽ ചാടി തിരികെ വന്ന വിജയ് ശങ്കർ പന്ത് പിടികൂടി. സഞ്ജു സാംസണിന്റെയും റിയാൻ പരാഗിന്റെയും 130 റൺസിന്റെ കൂട്ടുകെട്ടാണ് ഇവിടെ അവസാനിച്ചത്.
മത്സരത്തിൽ ആദ്യം ബാറ്റ് ചെയ്ത രാജസ്ഥാൻ 20 ഓവറിൽ മൂന്ന് വിക്കറ്റ് നഷ്ടത്തിൽ 196 റൺസെടുത്തു. സഞ്ജു സാംസണിന്റെയും റിയാൻ പരാഗിന്റെയും തകർപ്പൻ ബാറ്റിംഗാണ് റോയൽസിനെ മികച്ച സ്കോറിലേക്ക് എത്തിച്ചത്. സഞ്ജു 38 പന്തിൽ പുറത്താകാതെ 68 റൺസെടുത്തു. 48 പന്തിൽ 76 റൺസുമായാണ് റിയാൻ പരാഗ് മടങ്ങിയത്.