ജയ്പൂർ: ഇന്ത്യൻ പ്രീമിയർ ലീഗിൽ റോയൽ ചലഞ്ചേഴ്സിനെതിരെ തകർപ്പൻ ഒരു ഇന്നിംഗ്സാണ് സഞ്ജു സാംസൺ പുറത്തെടുത്തത്. 42 പന്തിൽ എട്ട് ഫോറും രണ്ട് സിക്സും സഹിതം താരം 69 റൺസെടുത്തു. രണ്ടാം വിക്കറ്റിൽ ജോസ് ബട്ലറിനൊപ്പം 148 റൺസാണ് സഞ്ജു കൂട്ടിച്ചേർത്തത്. പിന്നാലെ താരത്തിന് അവസരം നിഷേധിക്കുന്ന ബിസിസിഐക്കെതിരെ പ്രതിഷേധം ശക്തമാവുകയാണ്.
സഞ്ജുവിന്റെ ബാറ്റിംഗ് പോസ്റ്റ് ചെയ്തുകൊണ്ട് ഐസിസിക്കും ബിസിസിഐക്കും വേണ്ടാത്ത ഷോട്ടുകൾ എന്നാണ് ഒരു ആരാധകൻ പറഞ്ഞിരിക്കുന്നത്. മത്സരത്തിൽ മുഹമ്മദ് സിറാജിനെ അപ്പർകട്ടിന്റെ മാതൃകയിലുള്ള ഷോട്ടടിച്ച് സഞ്ജു സിക്സ് നേടിയിരുന്നു. പിന്നാലെ മായങ്ക് ഡാഗറിനെ സ്റ്റെപ് ഔട്ട് ചെയ്തും സഞ്ജു സിക്സറിന് പറത്തി. ഈ ദൃശ്യങ്ങളാണ് ആരാധകർ പോസ്റ്റ് ചെയ്തിരിക്കുന്നത്.
ട്വന്റി 20 ലോകകപ്പ് അടുത്തിരിക്കെ ഇന്ത്യൻ ടീമിൽ സഞ്ജുവിന് ഇടം നൽകണമെന്നാണ് ആരാധകരുടെ ആവശ്യം. ഇന്ത്യൻ ടീമിൽ സഞ്ജുവിന് സ്ഥിരം ഇടം നൽകണമെന്നും ആരാധകർ പറയുന്നു. അല്ലാത്ത പക്ഷം മികച്ചൊരു താരത്തെയാണ് നഷ്ടപ്പെടുന്നതെന്നും ആരാധകർ വ്യക്തമാക്കുന്നു.