ചെന്നൈ: മാർച്ച് 22ന് ഐപിഎല്ലിലെ ഉദ്ഘാടന മത്സരം കളിക്കാനിരിക്കെ ചെന്നൈ സൂപ്പർ കിംഗ്സിന് വീണ്ടും തിരിച്ചടി. ലങ്കൻ പേസർ മതീഷ പതിരാനയ്ക്ക് പരിക്കേറ്റെന്ന റിപ്പോർട്ടുകളാണ് പുറത്തുവരുന്നത്. നേരത്തെ ന്യുസീലാൻഡ് താരം ഡെവോൺ കോൺവേയെയും പരിക്കിനെ തുടർന്ന് ചെന്നൈക്ക് നഷ്ടമായിരുന്നു.
മാർച്ച് ആറിന് ബംഗ്ലാദേശിനെതിരായ ട്വന്റി 20 മത്സരത്തിനിടെയാണ് പതിരാനയ്ക്ക് പരിക്കേറ്റത്. മത്സരത്തിന്റെ പാതിക്ക് വെച്ച് താരം പിൻവാങ്ങുകയും ചെയ്തു. നാല് മുതൽ അഞ്ച് ആഴ്ച താരത്തിന് വിശ്രമം വേണ്ടി വരുമെന്നാണ് റിപ്പോർട്ടുകൾ. കഴിഞ്ഞ സീസണിൽ ചെന്നൈയ്ക്കായി 12 മത്സരങ്ങളിൽനിന്ന് 19 വിക്കറ്റുകളാണ് പതിരാന വീഴ്ത്തിയത്.
മാർച്ച് 22ന് നടക്കുന്ന ഉദ്ഘാടന മത്സരത്തിൽ റോയൽ ചലഞ്ചേഴ്സ് ബെംഗളൂരുവാണ് ചെന്നൈയുടെ എതിരാളികൾ. സീസണിൽ വിജയത്തോടെ തുടങ്ങുകയാണ് നിലവിലത്തെ ചാമ്പ്യന്മാരുടെ ലക്ഷ്യം.
