ലണ്ടൻ: വിംബിൾഡണിൽ കരുത്തർക്ക് ഇന്ന് മത്സരം. രണ്ടാം റൗണ്ട് മത്സരത്തിനിറങ്ങുന്ന നൊവാക് ജോക്കോവിച്ച് ഇന്ന് ഓസ്ട്രേലിയയുടെ ജോർദ്ദൻ തോംസണെ നേരിടും. ആദ്യ റൗണ്ടിൽ അമേരിക്കയുടെ പെട്രോ കാഷിനെയാണ് നൊവാക് തോൽപ്പിച്ചത്. 2017 ന് ശേഷം തോൽവി അറിയാതെയാണ് വിംബിൾഡണിൽ ജോക്കോവിച്ചിൻ്റെ കുതിപ്പ്. 24-ാം ​ഗ്രാൻ്റ് സ്ലാം ലക്ഷ്യമിടുന്ന ജോക്കോയ്ക്ക് ഇന്നത്തെ മത്സരം ആധികാരികമായി ജയിക്കുകയാണ് ലക്ഷ്യം.

ലോക ഒന്നാം നമ്പർ താരം ഇഗാ സ്യാതെക്കിനും ഇന്ന് മത്സരമുണ്ട്. സ്പാനിഷ് താരം സാറാ സോറിബെസ് ആണ് രണ്ടാം റൗണ്ടിൽ ഇ​ഗയുടെ എതിരാളി. വൈകുന്നേരം 7.15 നാണ് മത്സരം. ആദ്യ മത്സരത്തിൽ ചൈനീസ് താരത്തെ അനായാസം മറികടന്നാണ് ഇ​ഗയുടെ വരവ്. ഇത്തവണത്തെ വിംബിൾഡൺ കിരീട പ്രതീക്ഷയുള്ള താരങ്ങളിൽ ഒരാളാണ് ഇ​ഗ സ്വാംതെക്ക്.

ആദ്യ റൗണ്ടിൽ വീനസ് വില്യംസിനെ തോൽപ്പിച്ച ആത്മവിശ്വാസത്തിലാണ് എലീന സ്വീറ്റോളിന ഇന്നിറങ്ങുന്നത്. ബെൽജിയം താരം എലീസ് മെർട‌ൻസ് ആണ് രണ്ടാം റൗണ്ടിൽ എലീനയുടെ എതിരാളി. ജർമ്മൻ താരം അലക്സാണ്ടർ സുരേവും അമേരിക്കൻ താരം സെബാസ്റ്റ്യൻ കോർഡയും ഉള്‍പ്പടെയുള്ളവർ ഇന്ന് ആദ്യ മത്സരത്തിനിറങ്ങും.