ഗോവ: ഇന്ത്യന്‍ സൂപ്പര്‍ ലീഗില്‍ എഫ്‌സി ഗോവയ്‌ക്കെതിരായ ആദ്യപാദ സെമിഫൈനലില്‍ മുംബൈ സിറ്റി എഫ്സിക്ക് വിജയം. രണ്ടിനെതിരെ മൂന്ന് ഗോളുകള്‍ക്കാണ് മുംബൈ ഗോവയെ പരാജയപ്പെടുത്തിയത്. 90 മിനിറ്റ് വരെ രണ്ട് ഗോളുകള്‍ക്ക് പിന്നിട്ടുനിന്നതിന് ശേഷമാണ് മുംബൈ വിജയം പിടിച്ചെടുത്തത്.

സ്വന്തം തട്ടകമായ ഫത്തോര്‍ഡ സ്‌റ്റേഡിയത്തില്‍ നടന്ന മത്സരത്തില്‍ ഗോവയാണ് ആദ്യം ലീഡെടുത്തത്. 16-ാം മിനിറ്റില്‍ ബോറിസ് സിങ് ഗോവയുടെ ആദ്യ ഗോള്‍ നേടി. 56-ാം മിനിറ്റില്‍ ബ്രാണ്ടണ്‍ ഫര്‍ണാണ്ടസിലൂടെ ഗോവ സ്‌കോര്‍ ഇരട്ടിയാക്കി. ഗോവ വിജയമുറപ്പിച്ചെന്ന് തോന്നിപ്പിച്ച നിമിഷത്തിലാണ് മത്സരത്തിന്റെ ഗതി മാറിയത്.

നിശ്ചിത സമയത്തിന്‍റെ അവസാന മിനിറ്റില്‍ ലാലിയന്‍സുവാല ചാങ്‌തെയിലൂടെ മുംബൈ ഒരു ഗോള്‍ തിരിച്ചടിച്ചു. ഒരു മിനിറ്റിനകം വിക്രം പ്രതാപ് സിങ് ഗോളടിച്ചതോടെ മുംബൈ ഒപ്പമെത്തി. സമനിലയില്‍ പിരിയുമെന്ന് കരുതിയിരുന്ന ആതിഥേയരെ ഞെട്ടിച്ച് ഫൈനല്‍ വിസിലിന് മുന്‍പ് മുംബൈ ഒരു ഗോള്‍ കൂടി അടിച്ചു. 96-ാം മിനിറ്റില്‍ വീണ്ടും ചാങ്‌തെ നേടിയ ഗോളിലാണ് മുംബൈ അവിശ്വസനീയ വിജയമുറപ്പിച്ചത്.