ലണ്ടൻ: വിംബിൾഡൺ ടെന്നിസിൻ്റെ ആദ്യ റൗണ്ടിൽ നൊവാക് ജോക്കോവിച്ച്, കാസ്പർ റൂഡ്, ഇഗ ഷ്വാം‌ടെക്ക് എന്നിവർക്ക് വിജയത്തുടക്കം. വനിതാ സിംഗിൾസിൽ മുൻ ലോക ഒന്നാം നമ്പർ താരം വീനസ് വില്യംസ് ആദ്യ റൗണ്ടിൽ തോറ്റു. യുക്രൈൻ്റെ എലിന സ്വിറ്റോളിനയാണ് വീനസിനെ തോൽപ്പിച്ചത്. നേരിട്ടുള്ള സെറ്റുകൾക്കാണ് വീനസ് വില്യംസ് കീഴടങ്ങിയത്. സ്കോർ 6-4, 6-3.
വനിതാ സിംഗിൾസിലെ മറ്റൊരു മത്സരത്തിൽ ലോക ഒന്നാം നമ്പർ താരം ഇഗാ ഷ്വാടെക്ക് ചൈനയുടെ ലിൻ ഷുവിനെ അനായാസം മറികടന്നു. നേരിട്ടുള്ള സെറ്റുകൾക്കായിരുന്നു ഇഗയുടെ ജയം. സ്കോർ 6-1, 6-3. തികഞ്ഞ ആത്മവിശ്വാസത്തോടെ ആയിരുന്നു മത്സരിച്ചതെന്ന് ഇഗ പറഞ്ഞു. തൻ്റെ ജോലി മികച്ച രീതിയിൽ പൂർത്തിയാക്കാൻ കഴിഞ്ഞെന്നും ഇഗ വ്യക്തമാക്കി.
പുരുഷന്മാരുടെ സിംഗിൾസിൽ നിലവിലെ ചാമ്പ്യൻ നൊവാക്ക് ജോക്കോവിച്ചും ആദ്യ റൗണ്ടിൽ ജയിച്ചു. അർജൻ്റീനയുടെ പെട്രോ കാഷിനനെ ആയിരുന്നു ജോക്കോ തോൽപ്പിച്ചത്. ആദ്യ രണ്ട് സെറ്റിലും അനായാസം ജയിച്ചുകയറിയ ജോക്കോ മൂന്നാം സെറ്റിൽ ഒരൽപ്പം വിയർത്തു. ടെെ ബ്രേയ്ക്കറിലായിരുന്നു ജോക്കോയുടെ വിജയം. സ്കോർ 6-3, 6-3, 7-6(7-4).
കാസ്പർ റൂഡും തൻ്റെ ആദ്യ മത്സരം ജയിച്ചു തുടങ്ങി. ഫ്രാൻസിൻ്റെ ലൗറൻ്റ് ലൗക്കോലിയെ നാല് സെറ്റ് നീണ്ട പോരാട്ടത്തിലാണ് കാസ്പർ തോൽപ്പിച്ചത്. സ്കോർ 6-1, 5-7, 6-4, 6-3. മത്സരത്തിനിടെയെത്തിയ മഴ പല മത്സരങ്ങളും വൈകിച്ചു. തെന്നൽ നിറഞ്ഞ ഗ്രൗണ്ടിൽ കളിച്ചത് ബുദ്ധിമുട്ടായിരുന്നുവെന്ന് നോവാക് ജോക്കോവിച്ച് പ്രതികരിച്ചു.
