സംവിധായിക അഞ്ജലി മേനോൻ തമിഴിൽ അരങ്ങേറ്റം കുറിക്കാൻ ഒരുങ്ങുന്നു. കെആർജി സ്റ്റുഡിയോയുമായി സഹകരിച്ചാണ് തമിഴിൽ ആദ്യ ചിത്രം നിർമിക്കുന്നത്. അഞ്ജലി തന്നെയാണ് സോഷ്യൽ മീഡിയയിലൂടെ ഇക്കാര്യം അറിയിച്ചിരിക്കുന്നത്.
'സന്തോഷ വാർത്ത നിങ്ങളുമായി പങ്കുവെക്കുന്നു, അടുത്ത ചിത്രം കെആർജി സ്റ്റുഡിയോയുമായി സഹകരിച്ച് തമിഴിൽ ആരംഭിക്കുന്നു. എല്ലാവരുടെയും അനുഗ്രഹവും പ്രാര്‍ഥനയും ഉണ്ടാകണം'; എന്നാണ് അഞ്ജലി സോഷ്യൽ മീഡിയയിൽ കുറിച്ചത്. ചിത്രത്തെ കുറിച്ചുള്ള മറ്റുവിവരങ്ങൾ ഒന്നും തന്നെ സംവിധായിക പുറത്തു വിട്ടിട്ടില്ല.
കേരള കഫേ എന്ന ആന്തോളജി ചിത്രത്തിലെ 'ഹാപ്പി ജേര്‍ണി'യിലൂടെയാണ് അഞ്ജലി മേനോൻ മലയാളികൾക്ക് സുപരിചിതയാകുന്നത്. 'മഞ്ചാടിക്കുരു', 'ഉസ്താദ് ഹോട്ടൽ', 'കൂടെ', 'ബാംഗ്ലൂർ ഡേയ്‌സ്', തുടങ്ങിയ ചിത്രങ്ങൾ സംവിധാനം ചെയ്ത അഞ്ജലിയുടെ ഒടുവിൽ പുറത്തിറങ്ങിയ ചിത്രം 'വണ്ടർ വുമൺ' ആയിരുന്നു. ചിത്രത്തിന്റെ തിരക്കഥ ഒരുക്കിയതും അഞ്ജലി മേനോനായിരുന്നു.
