വാദി റം മരുഭൂമിയിൽ അക്ഷയകുമാറിന്റെ ചിത്രം 'ബഡേ മിയാന് ഛോട്ടേ മിയാന്' ചിത്രീകരണം പൂർത്തിയായി. അക്ഷയ് കുമാര്, ടൈഗര് ഷ്രോഫ് എന്നിവരെ ടൈറ്റില് കഥാപാത്രങ്ങളാക്കി അലി അബ്ബാസ് സഫര് ആണ് ചിത്രം സംവിധാനം ചെയ്യുന്നത്. ആക്ഷന് ത്രില്ലര് വിഭാഗത്തില് പെടുന്ന ചിത്രത്തിന്റെ നൂറിലധികം ദിവസം നീണ്ട ചിത്രീകരണത്തിനാണ് വാദി റം മരുഭൂമിയില് സാക്ഷിയായത്.
സിനിമയില് പൃഥ്വിരാജ് ആണ് പ്രതിനായകനായി എത്തുന്നത്. ദിവസങ്ങൾക്ക് മുന്പെത്തിയ ടീസര് പൃഥ്വിരാജിന്റെ മലയാളം സംഭാഷണത്തിലാണ് ആരംഭിച്ചത്. സലാറിന് ശേഷം പൃഥ്വിരാജ് പ്രധാന വേഷത്തിലെത്തുന്ന ഒരു മറുഭാഷാ ചിത്രമായിരിക്കും ബഡേ മിയാന് ഛോട്ടേ മിയാന്. കബീര് എന്നാണ് പൃഥ്വിരാജിന്റെ കഥാപാത്രത്തിന്റെ പേര്. ഹിന്ദിയില് പൃഥ്വിരാജിന്റെ നാലാമത്തെ ചിത്രമാണിത്. അയ്യാ, ഔറംഗസേബ്, നാം ഷബാന എന്നിവയാണ് ബോളിവുഡില് പൃഥ്വിയുടെ മുന് ചിത്രങ്ങള്.
പൃഥ്വിരാജ് നായകനാകുന്ന മലയാളക്കര കാത്തിരിക്കുന്ന ആടുജീവിതത്തിന്റെ ചിത്രീകരണവും വാദി റം മരുഭൂമിയിൽ വെച്ചായിരുന്നു. 160ന് മുകളില് ദിവസങ്ങളാണ് ആടുജീവിതത്തിന്റെ ചിത്രീകരണത്തിന് വേണ്ടി വന്നത്. ഏപ്രിൽ പത്തിന് ചിത്രം തിയേറ്ററുകളിൽ എത്തും. ബ്ലെസിയാണ് ചിത്രം സംവിധാനം ചെയ്യുന്നത്.