മുംബൈ: മുംബൈ വിമാനത്താവളത്തിലേക്ക് ഭീഷണി സന്ദേശം അയച്ചതിന് തിരുവനന്തപുരം സ്വദേശി പിടിയിൽ. മഹാരാഷ്ട്ര എടിഎസ് ആണ് പിടികൂടിയത്. കഴിഞ്ഞ ദിവസമാണ് ഇയാൾ മുംബൈ വിമാനത്താവളത്തിലേക്ക് ഭീഷണി സന്ദേശം അയച്ചത്. പത്തുലക്ഷം യുഎസ് ഡോളർ ബിറ്റ്കോയിനായി നൽകിയില്ലെങ്കിൽ വിമാനത്താവളം തകർക്കും എന്നായിരുന്നു ഭീഷണി.
ഇ മെയിൽ അയച്ച ഐപി അഡ്രസ് വഴിയാണ് പ്രതിയിലേക്ക് എത്തിയത്. പ്രതിയെ മുംബൈയിലേക്ക് കൊണ്ടുപോയി. ഇയാളുടെ ലാപ്ടോപ്, ഹാർഡ് ഡിസ്ക് എന്നിവ കസ്റ്റഡിയിൽ എടുത്തു. സംഭവത്തെ കുറിച്ച് കൂടുതല് വിവരങ്ങളറിയില്ലെന്നാണ് കേരളാ പൊലീസിൻ്റെ പ്രതികരണം.