മനാമ: ബഹ്റൈൻ കിരീടാവകാശിയും പ്രധാനമന്ത്രിയുമായ പ്രിൻസ് സൽമാൻ ബിൻ ഹമദ് അൽ ഖലീഫ ആഭ്യന്തര മന്ത്രി കേണൽ ജനറൽ ശൈഖ് റാശിദ് ബിൻ അബ്ദുല്ല അൽ ഖലീഫയുമായി കൂടിക്കാഴ്ച നടത്തി. ബഹ്റൈൻ പൊലീസ് ദിനാചരണത്തിന്റെ പശ്ചാത്തലത്തിലാണ് കൂടിക്കാഴ്ച നടത്തിയത്. ആഭ്യന്തര മന്ത്രിക്കും മന്ത്രാലയത്തിന് കീഴിലുള്ള മുഴുവൻ ഉദ്യോഗസ്ഥർക്കും ജീവനക്കാർക്കും പ്രധാനമന്ത്രി ആശംസകൾ അറിയിച്ചു.
രാജ്യത്തിന്റെ സാമൂഹിക സുരക്ഷക്കും സമാധാനപാലനത്തിനും പൊലീസ് സേന നിർവഹിച്ചുകൊണ്ടിരിക്കുന്ന പങ്ക് ഏറെ വലുതാണെന്നും അതിന് വേണ്ടി പ്രവർത്തിക്കുന്ന എല്ലാവരേയും താൻ ആശംസകൾ അറിയിക്കുന്നുവെന്നും അദ്ദേഹം വ്യക്തമാക്കി. ഏൽപിക്കപ്പെട്ട ഉത്തരവാദിത്തം നിർവഹിക്കുന്നതിൽ പൊലീസ് സേനയുടെ കഴിവും അർപ്പണബോധവും മികവുറ്റതും മാതൃകാപരവുമാണെന്നും കിരീടാവകാശി പറഞ്ഞു.
രാജാവ് ഹമദ് ബിൻ ഈസ ആൽ ഖലീഫയുടെ ഭരണത്തിൽ കെെവരിച്ച നേട്ടങ്ങളെ കുറിച്ചും അദ്ദേഹം എടുത്തു പറഞ്ഞു. ഏൽപിക്കപ്പെട്ട ഉത്തരവാദിത്തം നിർവഹിക്കുന്നതിൽ പൊലീസ് സേന വലിയ നേട്ടമാണ് കെെവരിച്ചത്. വലിയ തരത്തിൽ കഴിവും അർപ്പണ ബേധത്തോടെയുമാണ് പൊലീസ് പ്രവർത്തിക്കുന്നതെന്നും കിരീടാവകാശി കൂട്ടിച്ചേർത്തു.