പാരീസ്: ലാ ലീഗയില്‍ കിരീടത്തോട് അടുത്ത് റയല്‍ മാഡ്രിഡ്. മയ്യോര്‍ക്കയെ ഏകപക്ഷീയമായ ഒരു ഗോളിനാണ് റയല്‍ മാഡ്രിഡ് തകര്‍ത്തത്. ഫ്രഞ്ച് താരം ഔറേലിയന്‍ ചൗമേനിയുടെ സ്റ്റണ്ണര്‍ ഗോളിലൂടെയാണ് റയല്‍ മാഡ്രിഡ് വിജയമുറപ്പിച്ചത്.
മയ്യോര്‍ക്കയുടെ ഹോം ഗ്രൗണ്ടില്‍ നടന്ന മത്സരത്തിന്റെ ആദ്യ പകുതിയില്‍ ഗോളുകളൊന്നും വന്നില്ല. രണ്ടാം പകുതിയില്‍ 48-ാം മിനിറ്റിലാണ് മത്സരത്തിലെ ഏക ഗോള്‍ പിറന്നത്. 25 വാര അകലെ നിന്ന് തൊടുത്ത തകര്‍പ്പന്‍ ഷോട്ടാണ് ചൗമേനി ഗോളാക്കി മാറ്റിയത്. ഗോള്‍ തിരിച്ചടിക്കാന്‍ ആതിഥേയര്‍ക്ക് സാധിക്കാതിരുന്നതോടെ റയല്‍ വിജയമുറപ്പിച്ചു.
വിജയത്തോടെ 31 മത്സരങ്ങളില്‍ നിന്ന് 78 പോയിന്റുമായി ഒന്നാം സ്ഥാനത്ത് തന്നെ തുടരുകയാണ് റയല്‍. രണ്ടാമതുള്ള ബാഴ്‌സലോണയേക്കാള്‍ റയല്‍ 11 പോയിന്റിന് മുന്നിലാണുള്ളത്.
