റിയാദ്: സൗദി പ്രോ ലീഗിൽ കിരീടപോരാട്ടം ശക്തമാക്കി അൽ നസർ. ഒന്നിനെതിരെ രണ്ട് ഗോളുകൾക്ക് അൽ ഫത്തേഹിനെ തോൽപ്പിച്ച് അൽ നസർ പ്രോ ലീഗ് ടേബിളിൽ രണ്ടാം സ്ഥാനത്ത് തുടരുകയാണ്. ഒന്നാം സ്ഥാനത്തുള്ള അൽ ഹിലാലുമായി നാല് പോയിന്റ് വ്യത്യാസമാണ് അൽ നസറിനുള്ളത്.
ആവേശകരമായ ആദ്യ പകുതിയിൽ ഇരുടീമുകളും ഓരോ ഗോൾ വീതം നേടി. അൽ നസറിനേക്കാൾ നേരിയ മുൻതൂക്കം അൽ ഫത്തേഹിനുണ്ടായിരുന്നു. 17-ാം മിനിറ്റിൽ ക്രിസ്റ്റ്യാനോ റൊണാൾഡോയുടെ ഗോളിൽ അൽ നസർ മുന്നിലെത്തി. എന്നാൽ 29-ാം മിനിറ്റിൽ സലേം അൽ നജ്ദി സമനില ഗോൾ നേടി.
രണ്ടാം പകുതിയിൽ ഒട്ടാവിയോയുടെ ഹെഡർ ഗോൾ മത്സരവിധിയെഴുതി. മത്സരത്തിന്റെ അവസാന മിനിറ്റുകളിൽ ക്രിസ്റ്റ്യാനോ റൊണാൾഡോ വീണ്ടും ഗോളിന് അടുത്തെത്തി. എങ്കിലും അൽ ഫത്തേഹിന്റെ പ്രതിരോധ മികവ് സൂപ്പർ താരത്തിന് ഗോൾ അനുവദിച്ചില്ല.
