ഫ്ലോറിഡ: മേജർ ലീഗ് സോക്കറിന് മുമ്പായുള്ള അവസാന സൗഹൃദ മത്സരത്തിൽ ഇന്റർ മയാമിക്ക് സമനില. അർജന്റീനൻ ക്ലബ് ന്യൂവെല്‍സ് ഓള്‍ഡ് ബോയ്‌സിനോടാണ് മയാമിപ്പട സമനിലയിൽ പിരിഞ്ഞത്. ഇരുടീമുകളും ഓരോ ഗോൾ വീതം നേടി. മത്സരത്തിന്റെ ആദ്യ 60 മിനിറ്റ് ലയണൽ മെസ്സിയും ലൂയിസ് സുവാരസും കളത്തിലിറങ്ങി.
ആദ്യ പകുതിയിൽ ഒപ്പത്തിനൊപ്പമായിരുന്നു ഇരു ടീമുകളുടെയും മുന്നേറ്റം. പലതവണ മയാമി നിര ഗോൾമുഖത്തേയ്ക്ക് എത്തിയെങ്കിലും ന്യൂവെല്‍സ് പ്രതിരോധം ഫലപ്രദമായി ഇടപെട്ടു. മറുവശത്ത് ന്യൂവെൽസിന്റെ മുന്നേറ്റങ്ങൾ ഫിനിഷിങ്ങിലേക്ക് എത്തും മുമ്പെ മയാമി മധ്യനിരയിലും പ്രതിരോധനിരയിലുമായി അവസാനിച്ചു. 43-ാം മിനിറ്റിൽ ലഭിച്ച കോർണറിൽ ഒരു ഒളിംപിക് ഗോളിന് മെസ്സി ശ്രമിക്കുകയും ചെയ്തു.
രണ്ടാം പകുതിയിലും ഇരുടീമുകളും തുല്യമുന്നേറ്റം ആവർത്തിച്ചു. 60-ാം മിനിറ്റിൽ മെസ്സിയെയും സുവാരസിനെയും മയാമി പിൻവലിച്ചു. ഒടുവിൽ 64-ാം മിനിറ്റിൽ ന്യൂവെൽസ് പ്രതിരോധം പൊളിച്ച് ഇന്റർ മയാമി ഗോൾ നേടി. ഷാനിഡർ ബോർഗെലിൻ ആണ് ഗോൾ നേടിയത്. 83-ാം മിനിറ്റിൽ ന്യൂവെൽസ് മറുപടി ഗോൾ അടിച്ചു. ഫ്രാൻകോ മാർട്ടിൻ ഡയസാണ് ന്യൂവെൽസിനെ ഒപ്പമെത്തിച്ചത്.
അവശേഷിച്ച സമയത്ത് ഇരുടീമുകൾക്കും ഗോൾ നേടാൻ സാധിച്ചില്ല. ഇതോടെ മത്സരം സമനിലയിലായി. എം എൽ എസിന് മുമ്പ് ഏഴ് സൗഹൃദ മത്സരങ്ങളാണ് ഇൻർ മയാമി കളിച്ചത്. ഒരെണ്ണം വിജയിച്ചപ്പോൾ രണ്ട് സമനിലയും നാല് തോൽവിയും മയാമി നേരിട്ടു. ഈ മാസം 22ന് ആരംഭിക്കുന്ന മേജർ ലീഗ് സോക്കറിലെ ആദ്യ മത്സരത്തിൽ ഇന്റർ മയാമി റയൽ സാൾട്ട് ലേക്കിനെ നേരിടും.
