കൊൽക്കത്ത: ഡ്യൂറൻഡ് കപ്പിൽ കേരള ബ്ലാസ്റ്റേഴ്സിന് തോൽവിയോടെ തുടക്കം. മൂന്നിനെതിരെ നാല് ഗോളുകൾക്കാണ് ഗോകുലത്തിന്റെ ജയം. ആക്രമണത്തിലും പന്തടക്കത്തിലും ഷോട്ടുകളിലും ബ്ലാഴ്സ്റ്റേഴ്സ് ആയിരുന്നു മുന്നിൽ. പക്ഷേ ഗോൾ നേട്ടത്തിൽ ബ്ലാസ്റ്റേഴ്സിനെ പിന്നിലാക്കാൻ ഗോകുലത്തിന് കഴിഞ്ഞു. തുടർച്ചയായ രണ്ടാം വിജയത്തോടെ ഗോകുലം ക്വാർട്ടർ പ്രതീക്ഷകൾ സജീവമാക്കി.
മത്സരത്തിന്റെ തുടക്കം മുതൽ പന്ത് നിയന്ത്രിക്കുന്നതിൽ ബ്ലാസ്റ്റേഴ്സ് പ്രത്യേകം ശ്രമിച്ചിരുന്നു. പക്ഷേ ആദ്യ ഗോൾ അടിച്ചത് ഗോകുലമായിരുന്നു. 17-ാം മിനിറ്റിൽ നിലി പെർഡോമയുടെ കോർണർ തകർപ്പൻ ഹെഡ്ഡറിലൂടെ അമിനൗ ബൗബ വലയിലാക്കി. പിന്നാലെ ഒപ്പമെത്താനുള്ള ബ്ലാസ്റ്റേഴ്സ് ശ്രമങ്ങൾ 35-ാം മിനിറ്റിൽ ഫലം കണ്ടു. ജസ്റ്റിൻ ഇമ്മാനുവേലിന്റെ ബൂട്ടിൽ നിന്നായിരുന്നു ബ്ലാസ്റ്റേഴ്സിൻ്റെ സമനില ഗോൾ. പിന്നീട് കണ്ടത് ഗോകുലത്തിന്റെ തേരോട്ടം. 43-ാം മിനിറ്റിൽ വിഎസ് ശ്രീക്കുട്ടന്റെ ഹെഡ്ഡറിൽ ഗോകുലം ലീഡെടുത്തു. സ്കോർ 2-1. ആദ്യ പകുതിയുടെ ഇഞ്ചുറി ടൈമിൽ വീണ്ടും ഗോൾ. 46-ാം മിനിറ്റിൽ അഭിജിത്തിന്റെ ബുള്ളറ്റ് ഷോട്ട് വലചലിപ്പിച്ചു. സ്കോർ 3-1. ആദ്യ പകുതിയിൽ പന്തടക്കത്തിലും ഷോട്ടുകളുടെ എണ്ണത്തിലും മുന്നിൽ നിന്ന ബ്ലാസ്റ്റേഴ്സിന് പക്ഷെ ഗോൾ മാത്രം കണ്ടെത്താനായില്ല.
രണ്ടാം പകുതിയുടെ തുടക്കത്തിൽ വീണ്ടും ഗോകുലത്തിന്റെ മുന്നേറ്റം. 47-ാം മിനിറ്റിൽ അഭിജിത്തിൻ്റെ രണ്ടാം ഗോൾ. ഗോകുലത്തിന്റെ നാലാം ഗോൾ. ഗോകുലം മൂന്ന് ഗോൾ ലീഡെഡുത്തപ്പോഴും തളരാതെ പോരാടിയ ബ്ലാസ്റ്റേഴ്സ് ആക്രമണം കടുപ്പിച്ചു. 54-ാം മിനിറ്റിൽ പ്രബീർ ദാസിലൂടെ ബ്ലാസ്റ്റേഴ്സ് ഒരു ഗോൾ മടക്കി. തുടർച്ചയായി ഗോകുലത്തിന്റെ വലയിലേക്ക് ബ്ലാസ്റ്റേഴ്സ് മുൻനിര ഇരച്ചെത്തി. 77-ാം മിനിറ്റിൽ അഡ്രിയാൻ ലൂണയിലൂടെ മൂന്നാം ഗോൾ. എന്നാൽ അവശേഷിച്ച 13 മിനിറ്റിൽ ഗോൾ കണ്ടെത്താൻ കഴിയാതെ വന്നതോടെ ബ്ലാസ്റ്റേഴ്സിന് മത്സരം കൈവിട്ടു പോകുകയായിരുന്നു.
