സിഡ്നി: വനിത ലോകകപ്പിൽ ദക്ഷിണാഫ്രിക്കയെ തോൽപ്പിച്ച് നെതർലാൻഡ്സ് ക്വാർട്ടറിൽ. എതിരില്ലാത്ത രണ്ട് ഗോളിനായിരുന്നു നെതർലാൻഡ്സിൻ്റെ ജയം. മത്സരത്തിൻ്റെ ഒമ്പതാം മിനിറ്റിൽ തന്നെ നെതർലാൻഡ് മുന്നിലെത്തി. ജിൽ റൂർഡിൻ്റെ ഹെഡറാണ് നെതർലാൻഡ്സിനെ മുന്നിലെത്തിച്ചത്. ടൂർണ്ണമെന്റിലെ ജില്ലിൻ്റെ നാലാം ഗോളാണിത്. കഴിഞ്ഞ തവണത്തെ ഫൈനലിസ്റ്റുകളാണ് നെതർലാൻഡ്സ്.
പന്ത് നിയന്ത്രിക്കാൻ ദക്ഷിണാഫ്രിക്കൻ താരങ്ങൾ പരാജയപ്പെട്ടതോടെ നെതർലാൻഡ്സ് മത്സരത്തിൻ്റെ നിയന്ത്രണം ഏറ്റെടുത്തു. 29-ാം മിനിറ്റിൽ ഡച്ച് പട മറ്റൊരു അവസരം സൃഷ്ടിച്ചെങ്കിലും ഗോളായില്ല. ആദ്യ പകുതിയുടെ ഇഞ്ചുറി ടൈമിൽ ദക്ഷിണാഫ്രിക്ക തുടർച്ചയായി രണ്ട് അവസരങ്ങൾ സൃഷ്ടിച്ചു. ആദ്യ പകുതിയുടെ 72 ശതമാനം പന്തിന്റെ നിയന്ത്രണം നെതർലാൻഡ്സിനായിരുന്നു.
രണ്ടാം പകുതിയിലും പന്ത് കൈവശം വെയ്ക്കുന്നതിന് നെതർലാൻഡ്സ് പ്രത്യേകം ശ്രദ്ധിച്ചു. 54-ാം മിനിറ്റിൽ നെതർലാൻഡ്സ് വലകുലുക്കിയെങ്കിലും ഓഫ്സൈഡായി. പിന്നാലെ 68-ാം മിനിറ്റിൽ നെതർലാൻഡ്സ് ലീഡ് ഉയർത്തി. ലീനെത്ത് ബീരൻസ്റ്റെയിനായിരുന്നു വലകുലുക്കിയത്. നെതർലാൻഡ്സിന് ഒപ്പമെത്താൻ ദക്ഷിണാഫ്രിക്ക ശ്രമിച്ചെങ്കിലും ഗോളുകൾ നേടാനായില്ല. ലോകകപ്പിലെ അടുത്ത മത്സരം അമേരിക്കയും സ്വീഡനും തമ്മിലാണ്. അമേരിക്ക വിജയിച്ചാൽ നിലവിലത്തെ ചാമ്പ്യന്മാരും റണ്ണർ അപ്പുകളും ക്വാർട്ടറിൽ ഏറ്റുമുട്ടും.
