ഹൈദരാബാദ്: ടി20 ലോകകപ്പിനുള്ള ഇന്ത്യൻ ടീമിൽ ഇടം പിടിച്ച മലയാളി താരം സഞ്ജു സാംസണ് ആശംസകൾ അറിയിച്ച് നിരവധി പേർ രംഗത്തെത്തുകയാണ്. ഇപ്പോഴിതാ ഒരു പിച്ച് ക്യുറേറ്റർ സഞ്ജുവിനെ അഭിനന്ദിക്കുന്ന വീഡിയോയാണ് വൈറലാവുന്നത്. ഹൈദാരാബാദിലെ ഉപ്പൽ സ്റ്റേഡിയത്തിലെ ഒരു പിച്ച് ക്യുറേറ്റർ സഞ്ജുവിനെ അനുഗ്രഹിക്കുന്ന ഹൃദയഹാരിയായ വീഡിയോ രാജസ്ഥാൻ റോയൽസാണ് പങ്കുവെച്ചത്.
ക്യുറേറ്ററെ സഞ്ജു സന്തോഷത്തോടെ കെട്ടിപ്പിടിക്കുന്നതാണ് വീഡിയോയുടെ തുടക്കം. 'രാജ്യത്തിന് വേണ്ടി കളിക്കണം. ബാറ്റുകൊണ്ട് നിങ്ങളത് ചെയ്യുമെന്ന് എനിക്കറിയാം. നമ്മുടെ ടീം ഗംഭീരമായി തിരിച്ചുവരും. എന്റെ പ്രാർത്ഥനയും അനുഗ്രഹവും നിങ്ങൾക്കൊപ്പം എന്നുമുണ്ടാവും. എനിക്ക് ഒരുപാട് സന്തോഷമുണ്ട്. നിങ്ങൾ തീർച്ചയായും ലോകകപ്പ് വിജയിക്കും', വീഡിയോയിൽ ക്യുറേറ്റർ പറയുന്നു. ഗ്രൗണ്ട് സ്റ്റാഫുകളോടൊപ്പം നിന്ന് സഞ്ജു ഫോട്ടോ എടുക്കുന്നതും വീഡിയോയിൽ കാണാം.
വ്യാഴാഴ്ച സൺറൈസേഴ്സ് ഹൈദരാബാദുമായാണ് സഞ്ജു സാംസൺ നയിക്കുന്ന രാജസ്ഥാൻ റോയൽസിൻറെ മത്സരം. സൺറൈസേഴ്സിന്റെ ഹോം ഗ്രൗണ്ടായ ഹൈദരാബാദിലെ ഉപ്പൽ സ്റ്റേഡിയത്തിൽ വൈകിട്ട് 7.30നാണ് മത്സരം ആരംഭിക്കുക. ഇന്ത്യൻ പ്രീമിയർ ലീഗിൽ ഒൻപത് മത്സരങ്ങളിൽ നിന്ന് എട്ട് വിജയവും 16 പോയിന്റുമായി ഒന്നാം സ്ഥാനത്താണ് സഞ്ജുവിന്റെ രാജസ്ഥാൻ.