ഹൈദരാബാദ്: ഇന്ത്യൻ പ്രീമിയർ ലീഗിൽ മറ്റൊരു പോരാട്ടത്തിന് ഒരുങ്ങുകയാണ് സൺറൈസേഴ്സ് ഹൈദരാബാദും റോയൽ ചലഞ്ചേഴ്സ് ബെംഗളൂരുവും. മത്സരത്തിന് മുമ്പായി ഇരുടീമുകളും പരിശീലനത്തിലാണ്. ഇതിനിടെയിൽ സൺറൈഴേസ് നായകൻ പാറ്റ് കമ്മിൻസും റോയൽ ചലഞ്ചേഴ്സ് താരം വിരാട് കോഹ്‌ലിയും തമ്മിലുള്ള ഒരു സംഭാഷണമാണ് സമൂഹമാധ്യമങ്ങളിൽ തരംഗമാകുന്നത്.
വിരാട് കോഹ്‌ലിയുടെ അടുത്തെത്തിയ പാറ്റ് കമ്മിൻസ് പറയുകയാണ്. 'വിരാട്, നിങ്ങളുടെ പരിശീലകൻ പറയുന്നു. ഈ സ്റ്റേഡിയം താൻ ബാറ്റിംഗിന് അനുകൂലമാക്കിയിരിക്കുന്നുവെന്ന്. അത്രയെ ഞാൻ കേട്ടുള്ളു'. ഇതിന് മറുപടിയായി 'പാറ്റ് നിങ്ങൾ വളരെ നല്ലവനാണ്' എന്ന് കോഹ്‌ലിയും പറ‍യുന്നുണ്ട്. റോയൽ ചലഞ്ചേഴ്സ് ബെംഗളൂരുവാണ് ഈ വീഡിയോ പുറത്തുവിട്ടിരിക്കുന്നത്.
പാറ്റ് കമ്മിൻസും വിരാട് കോഹ്‌ലിയും ബാറ്റിംഗ് പരിശീലനം നടത്തുന്ന ദൃശ്യങ്ങൾ സൺറൈസേഴ്സ് ഹൈദരാബാദും പോസ്റ്റ് ചെയ്തിട്ടുണ്ട്. എന്തായാലും ചിന്നസ്വാമിയിലെ റൺഫെസ്റ്റിന് ശേഷം ഇരുടീമുകളും ഹൈദരാബാദിൽ ഏറ്റുമുട്ടുകയാണ്. ഇത്തവണയും റൺഫെസ്റ്റ് ഉണ്ടാകുമെന്ന പ്രതീക്ഷയിലാണ് ആരാധകർ.
