ഡൽഹി: ഇന്ത്യൻ പ്രീമിയർ ലീഗിൽ ഇന്നലെ റിഷഭ് പന്തിന്റെ ദിനമായിരുന്നു. 43 പന്തിൽ അഞ്ച് ഫോറും എട്ട് സിക്സും സഹിതം താരം 88 റൺസെടുത്തു. ഡൽഹിയെ മികച്ച സ്കോറിലെത്തിച്ചതും താരത്തിന്റെ തകർപ്പൻ ബാറ്റിംഗാണ്. എന്നാൽ പന്ത് അടിച്ച ഒരു സിക്സ് കൊണ്ട് ഐപിഎൽ ക്യാമറാമാന് പരിക്കേറ്റു. ഇതിന് താരം ക്യാമറാമനോട് ക്ഷമ ചോദിച്ചു.
മത്സരത്തിൽ ഡൽഹി ഇന്നിംഗ്സിന്റെ 20-ാം ഓവറിലാണ് സംഭവം. മോഹിത് ശർമ്മയുടെ പന്ത് അതിർത്തി കടത്തിയപ്പോഴാണ് ക്യാമറാമാന് പരിക്കേറ്റത്. മത്സര ശേഷം ഡൽഹി പരിശീലകൻ റിക്കി പോണ്ടിംഗിനൊപ്പം എത്തിയാണ് പന്ത് ക്യാമറാമാനോട് ക്ഷമചോദിച്ചത്.
പരിക്കേറ്റയാൾ അവിടെയുണ്ടെന്ന് റിക്കി പോണ്ടിംഗ് ചൂണ്ടിക്കാട്ടി. പിന്നാലെ അത് തന്റെ തെറ്റെന്ന് പന്ത് പറഞ്ഞു. അറിഞ്ഞുകൊണ്ടല്ല ആ തെറ്റ് ചെയ്തത്. താങ്കൾ വേഗത്തിൽ സുഖപ്പെടട്ടെ. എല്ലാ ആശംസകളും നേരുന്നുവെന്നും റിഷഭ് പന്ത് വ്യക്തമാക്കി.