ബെംഗളൂരു: ഇന്ത്യൻ പ്രീമിയർ ലീഗിൽ റോയൽ ചലഞ്ചേഴ്സ് ബെംഗളൂരുവിന്റെ എക്കാലത്തെയും മികച്ച താരങ്ങളിൽ ഒരാളാണ് അനിൽ കുംബ്ലെ. ഐപിഎല്ലിന്റെ രണ്ടാം സീസണിൽ റോയൽ ചലഞ്ചേഴ്സിനെ കുംബ്ലെ ഫൈനലിലെത്തിച്ചു. എന്നാൽ താൻ ഒരിക്കലും ഐപിഎൽ കളിക്കുമെന്ന് പ്രതീക്ഷിച്ചിരുന്നില്ലെന്ന് പറയുകയാണ് അനിൽ കുംബ്ലെ.
ഐപിഎൽ തുടങ്ങുന്നതിന് മുമ്പായി ഇന്ത്യൻ ടീമിന്റെ ടെസ്റ്റ് നായകനായിരുന്നു താൻ. താരലേലത്തിൽ തന്റെ പേരുണ്ടായിരുന്നു. ലേലത്തിൽ പേര് ഉയർന്നപ്പോൾ ആരും തനിക്കായി രംഗത്തുവന്നില്ല. എന്നാൽ ബെംഗളൂരു ഉടമ വിജയ് മല്യ പറഞ്ഞു. അവൻ എന്റെ പയ്യനാണ്, ബെംഗളൂരുകാരനാണ്. പിന്നെ അടിസ്ഥാന വിലയ്ക്ക് താൻ റോയൽ ചലഞ്ചേഴ്സിലെത്തി. മറ്റൊരു ടീമിലും തനിക്ക് അവസരം ലഭിക്കില്ലായിരുന്നുവെന്നും കുംബ്ലെ പ്രതികരിച്ചു.
ടെസ്റ്റ് ക്രിക്കറ്റിൽ നിന്ന് ട്വന്റി 20യിലേക്ക് മാറുന്നത് വെല്ലുവിളിയായിരുന്നു. ടെസ്റ്റിൽ ശരാശരി 60 ഓവർ എറിയണം. എന്നാൽ ട്വന്റി 20യിൽ നാല് ഓവർ എറിഞ്ഞാൽ മതി. അതിനായി മാനസികമായി തയ്യാറെടുക്കണം. ഏറ്റവും മികച്ച രീതിയിൽ തന്നെ ആ നാല് ഓവർ പൂർത്തിയാക്കണം. എന്നാൽ മാത്രമെ ബാറ്റർമാരുടെ സ്കോറിംഗ് പിടിച്ചുനിർത്താൻ കഴിയൂവെന്ന് കുംബ്ലെ വ്യക്തമാക്കി.