മൊഹാലി: ഇന്ത്യൻ പ്രീമിയർ ലീഗിൽ ഡി ആർ എസ് ദുരുപയോഗം നടത്തിയെന്ന് ആരോപണം. പഞ്ചാബ് കിംഗ്സും മുംബൈ ഇന്ത്യൻസും തമ്മിൽ നടന്ന മത്സരത്തിനിടെയാണ് സംഭവം. മുംബൈ ബാറ്റിംഗിന്റെ 15-ാം ഓവറിൽ അർഷ്ദീപ് സിംഗിന്റെ പന്ത് വൈഡ് ലൈനിലൂടെ കടന്നുപോയി. എന്നാൽ അമ്പയർ വൈഡ് അനുവദിച്ചില്ല.
ഈ സമയം മുംബൈ ഡഗ് ഔട്ടിൽ നിന്നും റിവ്യൂവിന് പോകാൻ ആവശ്യം ഉയർന്നു. മാർക് ബൗച്ചർ വൈഡ് സിഗ്നലും ടിം ഡേവിഡ് റിവ്യൂ ആവശ്യപ്പെടാനുള്ള സിഗ്നലും കാണിച്ചു. പിന്നാലെ സൂര്യകുമാർ യാദവ് റിവ്യൂ ആവശ്യപ്പെടുകയും ചെയ്തു. മുംബൈയ്ക്ക് അനുകൂലമായി മൂന്നാം അമ്പയർ വൈഡും അനുവദിച്ചു.
ഡ്രെസ്സിംഗ് റൂമിൽ നിന്നുള്ള നിർദ്ദേശം വന്നതിനാൽ റിവ്യൂ അനുവദിക്കരുതെന്ന് പഞ്ചാബ് നായകൻ സാം കരൺ ആവശ്യപ്പെട്ടു. എന്നാൽ അമ്പയർ സാം കരണിന്റെ ആവശ്യം തള്ളി. അമ്പയർ സംഘം മുംബൈ ഇന്ത്യൻസിന് അനുകൂലമായി തീരുമാനങ്ങളെടുക്കുന്നുവെന്നാണ് സമൂഹമാധ്യമങ്ങളിലെ വിമർശനം.
