മുംബൈ: ഇന്ത്യൻ പ്രീമിയർ ലീഗിൽ തകർപ്പൻ പ്രകടനവുമായി രോഹിത് ശർമ്മ മുന്നേറുകയാണ്. ട്വന്റി 20 ലോകകപ്പിൽ ഇന്ത്യയെ നയിക്കുകയെന്ന ഉത്തരവാദിത്തം രോഹിതിനുണ്ട്. അതിനാൽ ഐപിഎല്ലിൽ തന്റെ ബാറ്റിംഗ് കഴിവുകൾ വർദ്ധിപ്പിക്കുകയാണ് താരം. എന്നാൽ 36കാരനായ ഇന്ത്യൻ ക്യാപ്റ്റന് നേരെ വിരമിക്കൽ ചോദ്യങ്ങളും ഉയരുന്നുണ്ട്.
ഇതുവരെ വിരമിക്കുന്നതിനെക്കുറിച്ച് ആലോചിച്ചിട്ടില്ലെന്നാണ് ഇതിന് രോഹിതിന്റെ മറുപടി. മാത്രമല്ല ട്വന്റി 20 ലോകകപ്പും 2025ലെ ടെസ്റ്റ് ചാമ്പ്യൻഷിപ്പും ഇന്ത്യയ്ക്കായി വിജയിക്കണമെന്നും രോഹിത് പറയുന്നു. ഈ സമയത്തും മികച്ച ബാറ്റിംഗ് നടത്താൻ തനിക്ക് കഴിയുന്നുണ്ട്. കുറച്ചു വർഷങ്ങൾ കൂടെ ക്രിക്കറ്റിൽ തുടരാൻ കഴിയുമെന്നാണ് പ്രതീക്ഷയെന്നും രോഹിത് വ്യക്തമാക്കി.
ഏകദിന ലോകകപ്പിലെ തോൽവിയെക്കുറിച്ചും രോഹിത് സംസാരിച്ചു. 50 ഓവറിന്റെ ലോകകപ്പാണ് താൻ ചെറുപ്പം മുതൽ കണ്ടുവളർന്നത്. സ്വന്തം കാണികൾക്ക് മുന്നിൽ ലോകകിരീടം സ്വന്തമാക്കാൻ ആഗ്രഹിച്ചു. അതിനായി സാധ്യമായതെല്ലാം ചെയ്തിരുന്നതായും രോഹിത് ശർമ്മ വ്യക്തമാക്കി.