മുംബൈ: ഇന്ത്യൻ പ്രീമിയർ ലീഗിൽ മറ്റൊരു മോശം ഇന്നിംഗ്സ് കളിച്ചിരിക്കുകയാണ് വിരാട് കോഹ്‌ലി. ഒമ്പത് പന്ത് നേരിട്ട താരത്തിന് മൂന്ന് റൺസ് മാത്രമാണ് നേടാനായത്. കഴിഞ്ഞ മത്സരത്തിൽ സെഞ്ച്വറി നേടിയിട്ടും മോശം സ്ട്രൈക്ക് റേറ്റിന് കോഹ്‌ലിക്ക് വിമർശനങ്ങൾ നേരിടേണ്ടി വന്നു. ഇത്തവണ മോശം പ്രകടനം കൂടിയാതോടെ വിമർശനം കടുത്തു.
പാകിസ്താൻ മുൻ താരം ജുനൈദ് ഖാൻ ആണ് കോഹ്‌ലിയെ പരിഹസിച്ച് രംഗത്തെത്തിയത്. സ്ട്രൈക്ക് റേറ്റ് വെറും 33.33 എന്ന് ജുനൈദ് ഖാൻ സമൂഹമാധ്യമങ്ങളിൽ കുറിച്ചു. കഴിഞ്ഞ മത്സരത്തിന് ശേഷം ഏറ്റവും വേഗത കുറഞ്ഞ സെഞ്ച്വറിക്ക് അഭിനന്ദനങ്ങൾ എന്നാണ് ജുനൈദ് ഖാൻ പരിഹസിച്ചത്.
മത്സരത്തിൽ ആദ്യം ബാറ്റ് ചെയ്ത ബെംഗളൂരു എട്ട് വിക്കറ്റ് നഷ്ടത്തിൽ 196 റൺസെടുത്തു. എങ്കിലും പരാജയം ഒഴിവാക്കാൻ റോയൽ ചലഞ്ചേഴ്സ് ബൗളർമാക്ക് കഴിഞ്ഞില്ല. 15.3 ഓവറിൽ വെറും മൂന്ന് വിക്കറ്റ് നഷ്ടത്തിൽ മുംബൈ ലക്ഷ്യത്തിലെത്തി.
