ഡൽഹി: ഇംഗ്ലണ്ട് പരമ്പരയിൽ ഇന്ത്യയ്ക്കായി തകർപ്പൻ പ്രകടനം പുറത്തെടുത്തവരിൽ മുമ്പിലാണ് യശസ്വി ജയ്സ്വാൾ. രണ്ട് ഇരട്ട സെഞ്ച്വറിയടക്കം 712 റൺസാണ് താരം പരമ്പരയിൽ അടിച്ചുകൂട്ടിയത്. പിന്നാലെ തന്റെ പ്രകടന മികവിന് കാരണം ക്യാപ്റ്റൻ രോഹിത് ശർമ്മയുടെ പിന്തുണയെന്ന് വെളിപ്പെടുത്തുകയാണ് താരം.
ഡ്രെസ്സിംഗ് റൂമിൽ രോഹിത് ശർമ്മയുള്ളത് കരുത്താണ്. രോഹിതിന് കീഴിൽ കളിക്കാൻ കഴിയുന്നത് വലിയ ഭാഗ്യമാണ്. തനിക്ക് ഇപ്പോൾ വെളിപ്പെടുത്താൻ കഴിയാത്ത അത്ര മനോഹര നിമിഷങ്ങൾ ഡ്രെസ്സിംഗ് റൂമിൽ ഉണ്ടായി. ഈ പരമ്പരയിൽ ഉടനീളം രോഹിത് നൽകിയ പ്രോത്സാഹനം, സഹതാരങ്ങളോട് പെരുമാറുന്ന രീതി, രോഹിതിന്റെ ബാറ്റിംഗ് തുടങ്ങി എല്ലാം മികച്ചതാണെന്ന് ജയ്സ്വാൾ വ്യക്തമാക്കി.
ഏതൊരു സാഹചര്യത്തിലും രോഹിത് നമ്മുക്കൊപ്പം നിൽക്കും. ഒരു നായകന് വേണ്ട എല്ലാ ഗുണങ്ങളും രോഹിതിനുണ്ട്. ഇന്ത്യൻ നായകനിൽ നിന്ന് പഠിക്കാനുള്ള ശ്രമങ്ങളാണ് താൻ നടത്തുന്നതെന്നും ജയ്സ്വാൾ പ്രതികരിച്ചു.
