ചെന്നൈ: ഇംഗ്ലണ്ടിനെതിരായ ടെസ്റ്റ് പരമ്പരയിൽ മോശം തുടക്കമാണ് ശുഭ്മൻ ഗില്ലിന് ലഭിച്ചത്. എന്നാൽ അവസാന മത്സരങ്ങളിൽ താരം മികച്ച പ്രകടനവുമായി തിരിച്ചുവന്നു. ചേത്വേശ്വർ പൂജാരയ്ക്ക് പകരക്കാരനായി മൂന്നാം നമ്പറിലാണ് ഇപ്പോൾ ഗിൽ കളിക്കുന്നത്. ഒപ്പം വിരാട് കോഹ്‌ലിയുടെ പിൻഗാമിയാകുമെന്ന് പറയുന്ന താരവുമാണ് ഗിൽ. ഇക്കാര്യത്തിൽ സുപ്രധാന നിരീക്ഷണം നടത്തിയിരിക്കുകയാണ് സ്പിന്നർ രവിചന്ദ്രൻ അശ്വിൻ.
ഷോട്ട് മിഡ് വിക്കറ്റിൽ സ്കോർ ചെയ്യാൻ കോഹ്‌ലിയേക്കാൾ മികച്ചൊരു താരമില്ല. ഈ പരമ്പരയുടെ തുടക്കത്തിൽ ആ ഭാഗങ്ങളിൽ സ്കോർ ചെയ്യാൻ ഗിൽ ശ്രമിച്ചു. എന്നാൽ ഗില്ലിന് അത് സാധിച്ചില്ല. പക്ഷേ അവസാന ടെസ്റ്റുകളിൽ ഗിൽ ആ ബുദ്ധിമുട്ട് മറികടന്നു. അതിന് കാരണം താരത്തിന്റെ അദ്ധ്വാനമെന്നും അശ്വിൻ പറഞ്ഞു.
ഗില്ലിന് ഒരു വലിയ അഭിനന്ദനം നൽകാനും താൻ ആഗ്രഹിക്കുന്നു. ആദ്യ മത്സരങ്ങളിൽ ഗില്ലിന്റെ പ്രകടനം മോശമായിരുന്നു. സാങ്കേതികമായി ചില പ്രശ്നങ്ങൾ ഇന്ത്യൻ താരത്തിന്റെ ബാറ്റിംഗിൽ ഉണ്ടായിരുന്നു. എന്നാൽ വളരെ വേഗത്തിൽ അത് പരിഹരിക്കാൻ ഗില്ലിന് കഴിഞ്ഞു. ഇന്ത്യൻ ക്രിക്കറ്റിലെ അടുത്ത സൂപ്പർസ്റ്റാർ ഗില്ലെന്ന് സംശയമില്ലാതെ പറയാമെന്നും അശ്വിൻ വ്യക്തമാക്കി.
