ധരംശാല: ഇന്ത്യൻ ഓപ്പണർ യശസ്വി ജയ്സ്വാളിന്റെ ആക്രമണ ബാറ്റിംഗിന് കാരണം തന്റെ ശൈലിയെന്ന ബെൻ ഡക്കറ്റിന്റെ വാക്കുകൾക്ക് മറുപടിയുമായി ഇന്ത്യൻ നായകൻ രോഹിത് ശർമ്മ. ഡക്കറ്റ് കണ്ടിട്ടില്ലാത്ത ഒരാൾ ഇന്ത്യൻ ടീമിലുണ്ട്. റിഷഭ് പന്തെന്നാണ് അയാളുടെ പേര്. ജയ്സ്വാളിന്റെ പ്രകടനത്തിന് മാതൃക പന്തിന്റെ ബാറ്റിംഗെന്നും രോഹിത് ശർമ്മ പറഞ്ഞു.
ബാസ്ബോളെന്നാൽ എന്താണെന്ന് തനിക്ക് അറിയില്ല. എന്നാൽ കഴിഞ്ഞ തവണത്തേക്കാൾ മികച്ച പ്രകടനമാണ് ഇത്തവണ ഇംഗ്ലീഷ് ടീം പുറത്തെടുത്തതെന്നും രോഹിത് ശർമ്മ വ്യക്തമാക്കി. അഞ്ചാം ടെസ്റ്റിന് മുമ്പായി മാധ്യമപ്രവർത്തകരോട് സംസാരിക്കുകയായിരുന്നു ഇന്ത്യൻ നായകൻ
ഇന്ത്യ-ഇംഗ്ലണ്ട് അവസാന ടെസ്റ്റ് നാളെ ആരംഭിക്കും. പരമ്പരയിൽ ഇതുവരെ എട്ട് ഇന്നിംഗ്സിൽ നിന്നായി ജയ്സ്വാൾ 655 റൺസ് നേടിയിട്ടുണ്ട്. 93.57 ആണ് താരത്തിന്റെ ശരാശരി. രണ്ട് ഇരട്ട സെഞ്ച്വറി ഉൾപ്പടെയാണ് ജയ്സ്വാളിന്റെ പ്രകടനം.
