സെഞ്ചുറിയൻ: ഏകദിന ലോകകപ്പ് ഫൈനലിലെ ഹൃദയഭേദകമായ പരാജയത്തിന് ശേഷം രോഹിത് ശർമ്മയും വിരാട് കോഹ്ലിയും ഗ്രൗണ്ടിലേക്ക് മടങ്ങിയെത്തുകയാണ്. ദക്ഷിണാഫ്രിക്കയ്ക്കെതിരായ ടെസ്റ്റ് പരമ്പര നാളെ മുതൽ ആരംഭിക്കും. ലോകകപ്പ് തോൽവിയുടെ നിരാശയിൽ നിന്ന് ഇന്ത്യൻ താരങ്ങൾ പുറത്തുവരണമെന്ന് പറയുകയാണ് ഇന്ത്യൻ പരിശീലകൻ രാഹുൽ ദ്രാവിഡ്.
ഫൈനലിലെ തോൽവി നിരാശജനകമാണ്. എന്നാൽ അത് കഴിഞ്ഞു. അതിൽ നിന്നും പുറത്ത് കടക്കണം. ഇന്ത്യൻ താരങ്ങൾ അതിന് നിർബന്ധിതരാണ്. രോഹിതും കോഹ്ലിയും അടുത്ത ഇന്നിംഗ്സിന് തയ്യാറെടുക്കണം. എക്കാലവും തോൽവിയുടെ നിരാശയിൽ ജീവിക്കാൻ കഴിയില്ല. ക്രിക്കറ്റ് താരങ്ങൾ തോൽവികളെ നേരിടാൻ പഠിച്ചവരാണ്. കുട്ടികളായിരിക്കുമ്പോൾ മുതൽ നാം തോൽവികൾ നേരിടുന്നതാണ്. നിരാശരായി തുടർന്നാൽ അത് അടുത്ത മത്സരത്തെ ബാധിക്കുമെന്നും ദ്രാവിഡ് പറഞ്ഞു.
ദക്ഷിണാഫ്രിക്കയിൽ ഇന്ത്യ ടെസ്റ്റ് പരമ്പര നേടിയിട്ടില്ല. ഇവിടേയ്ക്കാണ് നിരാശരായ ഇന്ത്യൻ താരങ്ങൾ എത്തുന്നത്. ആർക്കും ആത്മവിശ്വാസം നൽകേണ്ടതില്ല. കാരണം അവരെല്ലാം ഇന്ത്യയ്ക്ക് വേണ്ടിയാണ് കളിക്കുന്നത്. നന്നായി ക്രിക്കറ്റ് പരിശീലിക്കുക. മാനസികമായും ശാരീരികമായും തയ്യാറെടുപ്പുകൾ നടത്തുക. തന്ത്രങ്ങൾ രൂപീകരിക്കുക. വിജയത്തിനായി മികച്ച അന്തരീഷം ഒരുക്കി നൽകുക എന്നതാണ് തന്റെ ജോലിയെന്നും ദ്രാവിഡ് വ്യക്തമാക്കി.