കൊൽക്കത്ത: ഒരു ദശാബ്ദമായി ഐസിസി ട്രോഫികൾ നേടാൻ ഇന്ത്യയ്ക്ക് കഴിഞ്ഞിട്ടില്ല. ഒക്ടോബറിൽ സ്വന്തം നാട്ടുകാർക്ക് മുന്നിൽ നടക്കുന്ന ലോകകപ്പ് ജയിക്കാമെന്ന പ്രതീക്ഷയിലാണ് ഇന്ത്യൻ ടീം. എങ്കിലും നിലവിലത്തെ ടീമിന്റെ പ്രകടനം ലോകകപ്പ് ജയത്തിന് പോന്നതല്ലെന്നാണ് ഒരു വിഭാഗത്തിന്റെ പ്രതികരണം. ഇക്കാര്യത്തിൽ പ്രതികരണവുമായി എത്തിയിരിക്കുകയാണ് ഇന്ത്യൻ മുൻ നായകൻ സൗരവ് ഗാംഗുലി.
രോഹിതിനും സംഘത്തിനും ഇത്തവണ ലോകകപ്പ് നേടാൻ കഴിയുമെന്ന് ഗാംഗുലി പറഞ്ഞു. ഇന്ത്യൻ ടീം ആശങ്കപ്പെടേണ്ട കാര്യമില്ല. എല്ലാ ലോകകപ്പുകളും ഒരു ടീമിന് ജയിക്കാൻ കഴിയില്ല. മോശം സമയം ഉണ്ടാകും. വിജയങ്ങൾക്ക് ഇടവേളകൾ ഉണ്ടാകും. ഇന്ത്യയ്ക്ക് നന്നായി ബാറ്റ് ചെയ്യാൻ കഴിയും. ഇന്ത്യ ജയിക്കാൻ മികച്ച ബാറ്റിങ് പുറത്തെടുക്കണമെന്നും സൗരവ് ഗാംഗുലി പറഞ്ഞു.
ലോകകപ്പിന് മുമ്പ് ഏഷ്യാ കപ്പും ഓസ്ട്രേലിയയ്ക്കെതിരായ പരമ്പരയുമാണുള്ളത്. ലോകകപ്പിൽ ഇതിൽ നിന്ന് വ്യത്യസ്തമാണ്. ആ നിമിഷത്തെ ആശ്രയിച്ചാണ് ഒരോ ടൂർണമെന്റുകളും മുന്നോട്ട് പോകുന്നത്. ഇന്ത്യ മികച്ച ടീമാണ്. ലോകകപ്പിൽ ഇന്ത്യയ്ക്ക് മികച്ച പ്രകടനം പുറത്തെടുക്കാൻ സാധിക്കുമെന്നും സൗരവ് ഗാംഗുലി പ്രതീക്ഷ പ്രകടിപ്പിച്ചു.