തീരൻ അധികാരം ഒൻട്ര് എന്ന സിനിമയിലൂടെ ശ്രദ്ധേയനായ സംവിധായകനാണ് എച്ച് വിനോദ്. അദ്ദേഹം കമൽഹാസനൊപ്പം ഒരുങ്ങി സിനിമ ചെയ്യുന്നുവെന്ന് പ്രഖ്യാപിച്ചിരുന്നെങ്കിലും ചില കാരണങ്ങളാൽ ആ ചിത്രം ഉപേക്ഷിച്ചുവെന്ന റിപ്പോർട്ടുകൾ വന്നിരുന്നു. ഇപ്പോഴിതാ എച്ച് വിനോദ് ധനുഷിനൊപ്പം സിനിമ ചെയ്യുന്നുവെന്ന റിപ്പോർട്ടുകളാണ് ഇപ്പോൾ വരുന്നത്.

ധനുഷിനോട് എച്ച് വിനോദ് കഥ പറഞ്ഞതായും താരത്തിന് കഥ ഇഷ്ടപ്പെതായും അടുത്ത വൃത്തങ്ങളെ ഉദ്ധരിച്ച് ഇ ടൈംസ് റിപ്പോർട്ട് ചെയ്യുന്നു. ആൾമാറാട്ടക്കാരനായാകും താരം സിനിമയിലെത്തുക എന്നും സൂചനകളുണ്ട്. ധനുഷ് ഇപ്പോൾ ശേഖർ കമ്മുലയുടെ സിനിമയുടെ തിരക്കുകളിലാണ്. അതിന് ശേഷമായിരിക്കും ഈ സിനിമയുടെ വർക്കുകൾ ആരംഭിക്കുക എന്നും റിപ്പോർട്ടുകളുണ്ട്.

അതേസമയം എച്ച് വിനോദ് തീരൻ അധികാരം ഒൻട്ര് എന്ന സിനിമയുടെ രണ്ടാം ഭാഗം ഒരുക്കാൻ പദ്ധതിയിടുന്നതായും റിപ്പോർട്ടുകളുണ്ട്. കാർത്തി തന്നെയേയിരിക്കും ഈ ചിത്രത്തിലും നായകനാവുക. തീരൻ 2നു പുറമെ യോഗി ബാബുവിനെ നായകനാക്കിയും എച്ച് വിനോദിന്റെ സിനിമ ഒരുങ്ങുന്നതായി സൂചനകളുണ്ട്.