ദില്ലി ചലോ മാര്‍ച്ച്: കര്‍ഷകരെ അനുനയിപ്പിക്കാന്‍ കേന്ദ്ര സര്‍ക്കാര്‍, ചർച്ച നടത്തും
ഡല്‍ഹി: ദില്ലി ചലോ മാര്‍ച്ച് പ്രഖ്യാപിച്ച കര്‍ഷകരെ അനുനയിപ്പിക്കാന്‍ കേന്ദ്ര സര്‍ക്കാര്‍. നാളെ ചണ്ഡിഗഢില്‍ കേന്ദ്ര മന്ത്രിമാർ കര്‍ഷക സംഘടന നേതാക്കളുമായി ചർച്ച നടത്തും. ചർച്ച പരാജയപ്പെട്ടാൽ പ്രതിഷേധം നേരിടാന്‍ ഡല്‍ഹി അടക്കം മൂന്ന് സംസ്ഥാനങ്ങളിൽ ഒരുക്കങ്ങൾ ആരംഭിച്ചു.
ചൊവ്വാഴ്ചയാണ് സംയുക്ത കിസാന്‍ മോര്‍ച്ച നോൺ പൊളിറ്റിക്കൽ വിഭാഗവും കിസാന്‍ മസ്ദൂര്‍ മോര്‍ച്ചയും ദില്ലി ചലോ മാര്‍ച്ച് നടത്തുക. മാര്‍ച്ചില്‍ 200 ലേറെ സംഘടനകള്‍ പങ്കെടുക്കുമെന്നാണ് വിവരം. ലോക്സഭ തിരഞ്ഞെടുപ്പ് അടുത്ത് നിൽക്കെ നടക്കുന്ന കർഷക പ്രതിഷേധങ്ങൾ സർക്കാരിന് വെല്ലുവിളിയാണ്. ഈ സാഹചര്യത്തിലാണ് കേന്ദ്രത്തിൻ്റെ അനുനയ നീക്കം.
കേന്ദ്ര കൃഷിമന്ത്രി അർജുൻ മുണ്ട, ഭക്ഷ്യമന്ത്രി പിയൂഷ് ഗോയൽ, ആഭ്യന്തരസഹമന്ത്രി നിത്യാനന്ദ് റായ് എന്നിവർ കര്‍ഷക സംഘടന നേതാക്കളുമായി ചര്‍ച്ച നടത്തും. നാളെ വൈകിട്ട് 5 മണിക്ക് ചണ്ഡിഗഢിലാണ് ചർച്ച. വിളകൾക്ക് താങ്ങുവില ഉറപ്പാക്കൽ, വിള ഇൻഷുറൻസ് പദ്ധതി, കർഷകർക്ക് എതിരായ എഫ്ഐആർ റദ്ദാക്കൽ എന്നിവയാണ് കർഷക സംഘടനകളുടെ ആവശ്യങ്ങള്‍. ചർച്ചകളിൽ സമവായം ഉണ്ടാക്കുക അത്ര എളുപ്പമല്ല.
ചര്‍ച്ച പരാജയപ്പെട്ടാൽ കര്‍ഷക പ്രതിഷേധം നേരിടാന്‍ ഹരിയാന - ഡല്‍ഹി അതിര്‍ത്തികളിൽ വന്‍ പൊലീസ് വിന്യാസം ഏര്‍പ്പെടുത്തി. പഞ്ചാബുമായുള്ള ഹരിയാനയുടെ പ്രധാന അതിർത്തികൾ അടച്ചു. പഞ്ച് കുലയില്‍ നിരോധനാജ്ഞ പ്രഖ്യാപിച്ചു. ഹരിയാനയില്‍ റോഡുകളിൽ ബാരിക്കേഡുകൾ നിരത്തി. ഇന്ന് അർധരാത്രി മുതൽ രണ്ട് ദിവസം സംസ്ഥാനത്തെ ഏഴ് ജില്ലകളിൽ ഇന്‍റര്‍നെറ്റ് നിരോധനം ഏർപ്പെടുത്തും. കൂട്ടമായി എസ്എംഎസ് അയക്കുന്നതിനും നിയന്ത്രണമുണ്ടാകും.