സ്ലൊവീന്യ: യൂറോ കപ്പിന് മുമ്പായുള്ള സൗഹൃദ മത്സരത്തിൽ പോർച്ചു​ഗലിന് തോൽവി. എതിരില്ലാത്ത രണ്ട് ​ഗോളിന് സ്ലൊവീന്യ പീരങ്കിപ്പടയെ തകർത്തെറിഞ്ഞു. സൂപ്പർതാരം ക്രിസ്റ്റ്യനോ റൊണാൾഡോയുടെ മോശം ഫോമാണ് പോർച്ചു​ഗലിന് തിരിച്ചടിയായത്. മത്സരത്തിൽ ഒരു ഷോട്ട് മാത്രമാണ് താരത്തിന് നേടാൻ കഴിഞ്ഞത്.

മത്സരത്തിൽ ഭൂരി​ഭാ​ഗവും പോർച്ചു​ഗീസ് സംഘം പന്തിനെ നിയന്ത്രിച്ചു. 10 ഷോട്ടുകൾ പായിച്ചെങ്കിലും രണ്ട് എണ്ണമെ പോസ്റ്റിലേക്ക് ലക്ഷ്യം വെച്ചുള്ളു. ആദ്യ പകുതി ​ഗോൾ രഹിത സമനിലയായി. 72-ാം മിനിറ്റിൽ ആദം സെറിനും 80-ാം മിനിറ്റിൽ ടിമി മാക്സും ​ഗോളുകൾ നേടി.

തോൽവിയോടെ പോർച്ചു​ഗലിന്റെ തുടർച്ചയായ 11 മത്സരങ്ങളിലെ വിജയകുതിപ്പിനാണ് അവസാനമായത്. ജർമ്മനിയിലെ യൂറോ കപ്പിന് രണ്ട് മാസം ബാക്കി നിൽക്കെ തെറ്റുകൾ തിരുത്താനുണ്ടെന്നാണ് ക്രിസ്റ്റ്യനോയ്ക്കും സംഘത്തിനും മുന്നറിയിപ്പ് ലഭിച്ചിരിക്കുന്നത്.