ധരംശാല: ഇംഗ്ലണ്ടിനെതിരായ അഞ്ചാം ടെസ്റ്റിൽ ഇന്ത്യ ശക്തമായ നിലയിൽ. മത്സരത്തിന്റെ രണ്ടാം ദിവസം ആദ്യ സെഷൻ പിന്നിടുമ്പോൾ ഇന്ത്യ ഒരു വിക്കറ്റ് നഷ്ടത്തിൽ 264 റൺസെടുത്തിട്ടുണ്ട്. ക്യാപ്റ്റൻ രോഹിത് ശർമ്മയും ശുഭ്മൻ ഗില്ലും സെഞ്ച്വറിയുമായി പുറത്താകാതെ നിൽക്കുകയാണ്. ഒന്നാം ഇന്നിംഗ്സിൽ ഇന്ത്യയുടെ ലീഡ് 46 റൺസിലെത്തി.
രണ്ടാം ദിനം ഒന്നിന് 135 എന്ന നിലയിലാണ് ഇന്ത്യ ബാറ്റിംഗ് പുഃനരാരംഭിച്ചത്. ബൗളർമാരെ മാറ്റി മാറ്റി ഉപയോഗിക്കുക മാത്രമാണ് ബെൻ സ്റ്റോക്സിന് ചെയ്യാനുണ്ടായിരുന്നത്. ആർക്കും ഗിൽ-രോഹിത് സഖ്യത്തെ വീഴ്ത്താൻ കഴിഞ്ഞില്ല. ഇരുവരും തമ്മിലുള്ള രണ്ടാം വിക്കറ്റ് കൂട്ടുകെട്ട് 160 റൺസിൽ എത്തി നിൽക്കുകയാണ്.
രോഹിത് 160 പന്തിൽ 102 റൺസെടുത്തിട്ടുണ്ട്. 13 ഫോറും മൂന്ന് സിക്സും സഹിതമാണ് രോഹിതിന്റെ ഇന്നിംഗ്സ്. ഗിൽ 142 പന്തിൽ 101 റൺസെടുത്തിട്ടുണ്ട്. 10 ഫോറും അഞ്ച് സിക്സും ഗില്ലിന്റെ ബാറ്റിൽ നിന്ന് പിറന്നു. ഒന്നാം ഇന്നിംഗ്സിൽ ഇംഗ്ലണ്ട് 218 റൺസിന് പുറത്തായിരുന്നു.