വിഴിയനഗരം: രഞ്ജി ട്രോഫി ക്രിക്കറ്റിൽ ഒന്നാം ഇന്നിം​ഗ്സിൽ കേരളം പൊരുതുന്നു. രണ്ടാം ദിവസം രണ്ട് സെഷൻ പൂർത്തിയാകുമ്പോൾ കേരളം മൂന്ന് വിക്കറ്റ് നഷ്ടത്തിൽ 144 റൺസെന്ന നിലയിലാണ്. 61 റൺസെടുത്ത രോഹൻ കുന്നുന്മേലിന്റെ ഇന്നിം​ഗ്സാണ് കേരളത്തിന് തുണയായത്. കൃഷ്ണ പ്രസാദ് 44 റൺസെടുത്ത് പുറത്തായി.

രണ്ടാം ദിനം ഏഴിന് 260 റണ്‍സെന്ന നിലയിലാണ് ആന്ധ്ര ബാറ്റിം​ഗ് പുനഃരാരംഭിച്ചത്. 12 റൺസ് കൂടി നേടുന്നതിനിടയിൽ അവശേഷിച്ച മൂന്ന് വിക്കറ്റുകൾ കൂടി ആന്ധ്രയ്ക്ക് നഷ്ടമായി. 272 റൺസിൽ ആന്ധ്ര ഇന്നിം​ഗ്സ് അവസാനിച്ചു. കേരളത്തിനായി ബേസിൽ തമ്പി നാല് വിക്കറ്റെടുത്തു.

ഒന്നാം ഇന്നിം​ഗ്സ് ബാറ്റിം​ഗിനിറങ്ങിയ കേരളത്തിന് നാല് റൺസെടുത്ത ജലജ് സക്സേനയുടെ വിക്കറ്റ് വേ​ഗത്തിൽ നഷ്ടമായി. രണ്ടാം വിക്കറ്റിൽ രോഹനും കൃഷ്ണ പ്രസാദും 86 റൺസ് കൂട്ടിച്ചേർത്തു. ഇരുവരും പുറത്തായതിന് ശേഷം എത്തിയ സച്ചിൻ ബേബിയും അക്ഷയ് ചന്ദ്രനുമാണ് ഇപ്പോൾ ക്രീസിൽ. സച്ചിൻ 19ഉം അക്ഷയ് 11ഉം റൺസെടുത്തു.