ആലപ്പുഴ: കായംകുളത്തെ സിപിഎമ്മിലെ അണിയറ രഹസ്യങ്ങൾ പുറത്ത് വരുന്നത് ഫെയ്സ്ബുക്കിലൂടെയാണ്. പരസ്പരം മൽസരിക്കുന്ന രണ്ട് ഫെയ്സ്ബുക്ക് അക്കൗണ്ടുകളാണ് എല്ലാ രഹസ്യങ്ങളും പുറത്ത് കൊണ്ടു വരുന്നതിന് പിന്നിലെന്നാണ് വിവരം. നേതാക്കളുടെ പേരും പദവിയുമടക്കം വെളിപ്പെടുത്തിയാണ് ഇവരുടെ നീക്കങ്ങൾ. ഇതിലൂടെയാണ് നിഖിൽ തോമസിന്റെ വ്യാജ ഡിഗ്രി വിവാദവും പുറത്ത് വന്നത്.
കായംകുളത്തിന്റെ വിപ്ലവം, ചെമ്പട കായംകുളം എന്നിങ്ങനെ പേരുള്ള രണ്ട് ഗ്രൂപ്പുകളാണ് രഹസ്യങ്ങൾ പുറത്ത് കൊണ്ടുവരുന്നതിന്റെ പിന്നിലുള്ളത്. വ്യാജ അക്കൗണ്ടുകളെന്ന് തോന്നുമെങ്കിലും രഹസ്യയോഗങ്ങളിൽ പറയുന്ന കാര്യങ്ങളെല്ലാം ഇവർ തുറന്നെഴുതും. സിപിഐഎം, ഡിവൈഎഫ്ഐ, എസ്എഫ്ഐ വ്യത്യാസമില്ലാതെ പാർട്ടിക്കുള്ളിൽ നടക്കുന്നത് എല്ലാം ഇവർ പരസ്യമാക്കും.
നേതാക്കളുടെ ഗ്രൂപ്പിസം, അവിഹിതം, ഗുണ്ടായിസം, പ്രണയം, വഞ്ചന തുടങ്ങിയ കാര്യങ്ങളെല്ലാം ആ ഗ്രൂപ്പിൽ ചർച്ചയാകും. ഭാര്യയെ തല്ലിയ ജില്ലാ പഞ്ചായത്ത് വൈസ് പ്രസിഡൻ്റിനെയും നഗ്ന വീഡിയോ കോൾ ചെയ്തതിന് പുതുപ്പള്ളി ലോക്കൽ കമ്മിറ്റി അംഗത്തെയും പാർട്ടി സസ്പെൻ്റ് ചെയ്തത് ഇത്തരത്തിൽ എഫ് ബി ഗ്രൂപ്പുകളുടെ ഈ തുറന്നെഴുത്തിലൂടെയായിരുന്നു.
