മലാ​ഗ: ‌ടെന്നിസിൽ ലോക ഒന്നാം നമ്പർ താരം നൊവാക് ജോക്കോവിച്ചിനെ രണ്ട് തവണ തോൽപ്പിച്ച് ജാനിക് സിന്നർ. ഡേവിസ് കപ്പ് സെമി ഫൈനലിനിടെയാണ് അപൂർവ്വ നേട്ടം സിന്നർ സ്വന്തമാക്കിയത്. ആദ്യം സിം​ഗിൾസിലും പിന്നീട് ഡബിൾസിലും ജോക്കോവിച്ചിനെ സിന്നർ പരാജയപ്പെടുത്തി. ഇതോടെ സെർബിയയെ തോൽപ്പിച്ച് 25 വർഷത്തിന് ശേഷം ഇറ്റലി ഡേവിസ് കപ്പിന്റെ സെമിയിൽ കടന്നു. ഡേവിസ് കപ്പ് സിംഗിൾസിൽ 21 തുടർവിജയങ്ങളെന്ന ജോക്കോവിച്ചിന്റെ റെക്കോർഡും തകർന്നുവീണു.

സിം​ഗിൾസിൽ 6-2, 2-6, 7-5 എന്ന പോയിന്റിനായിരുന്നു സിന്നറിന്റെ വിജയം. ഡബിൾസിൽ ലോറെൻസോ സോനെഗോയോടൊപ്പം ചേർന്നാണ് സിന്നർ, ജോക്കോവിച്ച്-മിയോമിർ കെക്മാനോവിച്ച് സഖ്യത്തെ പരാജയപ്പെടുത്തിയത്. നേരിട്ടുള്ള സെറ്റുകൾക്കാണ് സിന്നർ സഖ്യത്തിന്റെ വിജയം. സ്കോർ 6-3, 6-4.

കഴിഞ്ഞ 12 ദിവസത്തിൽ മൂന്നാം തവണയാണ് സിന്നറും ജോക്കോവിച്ചും നേർക്കുനേർ വരുന്നത്. എടിപി വേൾഡ് ടൂർ ഫൈനലിൽ ഇരുവരും ഏറ്റുമുട്ടിയപ്പോൾ ജോക്കോവിച്ചിനായിരുന്നു ജയം. ഡേവിസ് കപ്പിന്റെ ഫൈനലിൽ ഇറ്റലി, ഓസ്ട്രേലിയയെ നേരിടും.