ലണ്ടൻ : ലോക ടെന്നിസ് റാങ്കിങ്ങിൽ കാർലോസ് അൽക്കറാസ് വീണ്ടും ഒന്നാം സ്ഥാനത്ത്. ക്യൂൻസ് ക്ലബ് ചാമ്പ്യൻഷിപ്പ് സ്വന്തമാക്കിയതോടെയാണ് കാർലോസ് റാങ്കിങ്ങിൽ വീണ്ടും ഒന്നാമത് എത്തിയത്. നൊവാക് ജോകോവിച്ചിനെ മറികടന്നാണ് കാർലോസിൻ്റെ മുന്നേറ്റം. പുൽക്കോർട്ടിൽ മൂന്നാമത്തെ ടൂർണമെൻ്റ് മാത്രം കളിക്കുന്ന അൽക്കറാസിൻ്റെ ആദ്യ കിരീടമാണിത്. ഓസ്ട്രേലിയൻ താരം അലക്സ് ഡി മിനാറിനെ നേരിട്ടുള്ള സെറ്റുകൾക്കാണ് കാർലോസ് തോൽപ്പിച്ചത്. സ്കോർ 6-4, 6-4. ലോക റാങ്കിൽ ഒന്നാം സ്ഥാനത്തുള്ള കാർലോസിന് 7,675 പോയിൻ്റുണ്ട്. 7,595 പോയിൻ്റോടെ ജോകോവിച്ച് തൊട്ടുപിന്നിലുണ്ട്. 2022 ൽ യുഎസ് ഓപ്പണിൽ കാസ്പർ റൂഡിനെ തോൽപ്പിച്ചായിരുന്നു നേരത്തെ സ്പാനിഷ് താരം കാർലോസ് റാങ്കിങ്ങിൽ ഒന്നാമതെത്തിയത്.

അതിനിടെ വിംബിൾഡൺ കിരീട സാധ്യതയിൽ മുന്നിലുള്ളത് ജോകോവിച്ചിനെന്ന് കാർലോസ് പറഞ്ഞു. വിംബിൾഡണിൽ മറ്റ് താരങ്ങളെക്കാൾ വിജയം നേടിയിട്ടുള്ളത് ജോക്കോ ആണ്. നൊവാകിനെ ഫൈനലിൽ തോൽപ്പിക്കുകയാണ് തൻ്റെ ലക്ഷ്യം. വിജയത്തിനായി തന്റെ കഴിവിൻ്റെ പരമാവധി ശ്രമിക്കും. സമീപകാലത്തെ പ്രകടനങ്ങളിൽ താൻ സംതൃപ്തനാണ്. വിംബിൾഡണിന് മുമ്പ് തനിക്ക് ആത്മവിശ്വാസം വർദ്ധിച്ചതായും കാർലോസ് വ്യക്തമാക്കി.

രണ്ട് ആഴ്ച മുമ്പാണ് ജോക്കോവിച്ച് ലോക ടെന്നിസ് റാങ്കിങ്ങിൽ ഒന്നാം സ്ഥാനത്ത് തിരികെ എത്തിയത്. വിംബിൾഡണിന് ഒരുങ്ങുന്ന ജോക്കോയ്ക്ക് കിരീടം നിലനിർത്തുകയാണ് ലക്ഷ്യം. 2013 ൽ ആൻ്റി മറെയോട് തോറ്റ ശേഷം വിംബിൾഡൺ ഫൈനലിൽ നൊവാക് തോൽവി അറി‍ഞ്ഞിട്ടില്ല. 2013 ന് ശേഷം നടന്ന എട്ട് വിംബിൾഡണിൽ ആറിലും കിരീടം സെർബിയൻ താരത്തിനാണ്. 2018 മുതൽ തുടർച്ചയായി ജോക്കോ‌വിച്ച് തന്നെയാണ് വിംബിൾഡണിൽ കിരീടം കൈവശം വെച്ചിരിക്കുന്നത്.