പാലക്കാട്: തൂതയിലെ ബാല വിവാഹത്തിൽ ക്ഷേത്രം ക്ലർക്കിനെ സസ്പെൻഡ് ചെയ്തു. വധൂ-വരന്മാരുടെ പ്രായം തെളിയിക്കുന്ന രേഖ സൂക്ഷിക്കാത്തതിന് രാമകൃഷ്ണനെയാണ് സസ്പെൻഡ് ചെയ്തത്.

പാലക്കാട് ചെർപ്പുളശ്ശേരിയിലാണ് ബാലവിവാഹം ന‌ടന്നത്. ചെർപ്പുളശ്ശേരി സ്വദേശിയായ പതിനേഴുകാരിയെ വിവാഹം ചെയ്തതിൽ ഭർത്താവിനും പെൺകുട്ടിയുടെ മാതാപിതാക്കൾക്കുമെതിരെ പൊലീസ് കേസ് എടുത്തിരുന്നു. സിഡബ്ല്യുസിയുടെ നിർദേശത്തെ തുടർന്ന് ബാലവിവാഹ നിരോധന നിയമ പ്രകാരമാണ് കേസ് എടുത്തത്.

എന്നാൽ സംഭവത്തിന് ശേഷം മൂന്ന് പേരും ഒളിവിൽ പോയെന്ന് പൊലീസ് പറഞ്ഞു. കഴിഞ്ഞ ജൂൺ 29 ന് തൂത ക്ഷേത്രത്തിൽ വെച്ചായിരുന്നു ഇവരുടെ വിവാഹം. സംഭവത്തിൽ കൂടുതൽ പേരെ പ്രതി ചേർക്കുമെന്ന് പൊലീസ് അറിയിച്ചു.