മലയാള സിനിമകൾക്ക് തിയേറ്റർ ശൃംഖലയായ പിവിആർ ഏർപ്പെടുത്തിയ വിലക്കും പിന്നീട് ഇത് പരിഹരിച്ചതെല്ലാം സിനിമാ മേഖലയിൽ വലിയ ചർച്ചയായിരുന്നു. വിഷു റിലീസായെത്തിയ മലയാളം ചിത്രങ്ങൾക്കെല്ലാം കനത്ത നഷ്ടമാണ് പിവിആറിന്റെ നടപടി ഉണ്ടാക്കിയത്. 11 ന് ആരംഭിച്ച ബഹിഷ്കരണം 13-ാം തീയതി വൈകീട്ടാണ് അവസാനിച്ചത്.

വ്യവസായി എംഎ യൂസഫലിയുടെ മധ്യസ്ഥതയില്‍ നടന്ന ചര്‍ച്ചയിലാണ് പിന്നീട് പരിഹാരമായത്. ഇപ്പോൾ ഈ വിഷയത്തിൽ മലയാള സിനിമയ്ക്ക് പിന്തുണയുമായി രം​ഗത്തെത്തിയിരിക്കുകയാണ് തെലുങ്ക് ചലച്ചിത്ര നിർമാതാക്കളുടെ സംഘടനയായ ആക്ടീവ് തെലുങ്കു ഫിലിം പ്രൊഡ്യൂസേഴ്സ് ​ഗിൽഡ്.

ഇന്ത്യയിലെമ്പാടും പ്രദർശിപ്പിക്കുന്ന മലയാളസിനിമകൾ ഒരു മൾട്ടിപ്ലെക്സ് ശൃംഖല ഏകപക്ഷിയമായി നീക്കം ചെയ്യുന്നതിനെ ശക്തമായി അപലപിക്കുന്നുവെന്ന് തെലുങ്കു പ്രൊഡ്യൂസേഴ്സ് ​ഗിൽഡ് എക്സിൽ പോസ്റ്റ് ചെയ്തു. ന്യായമായ ബിസിനസ് സമ്പ്രദായങ്ങൾ പിന്തുടരുന്നതിനായി കേരളത്തിലെ ചലച്ചിത്ര നിർമാതാക്കൾക്കൊപ്പം നിൽക്കുന്നു. തങ്ങൾ എന്നും ഒരുമിച്ച് നിൽക്കുമെന്നും അവർ കൂട്ടിചേർത്തു. ഈ കുറിപ്പ് തെലുങ്കിലെ പ്രമുഖ നിർമാതാക്കളായ മൈത്രി മൂവി മേക്കേഴ്സും പങ്കുവെച്ചിട്ടുണ്ട്.

പിവിആറുമായി ബന്ധപ്പെട്ടുള്ള ഈ പ്രശ്നങ്ങളേത്തുടർന്ന് മൈത്രി മൂവി മേക്കേഴ്സ് തെലുങ്കിൽ മൊഴിമാറ്റിയെത്തിച്ച മഞ്ഞുമ്മൽ ബോയ്സ് എന്ന ചിത്രത്തിന്റെ പ്രദർശനങ്ങളും മുടങ്ങിയിരുന്നു.