മുംബൈ: മഹാരാഷ്ട്ര കോണ്‍ഗ്രസ് അധ്യക്ഷന്‍ നാനാ പടോലെയുടെ കാര്‍ അപകടത്തില്‍പ്പെട്ടു. ചൊവ്വാഴ്ച്ച രാത്രി ഭന്ദാരയില്‍വെച്ചായിരുന്നു സംഭവം. അദ്ദേഹം സഞ്ചരിച്ച കാറിലേക്ക് ട്രക്ക് വന്നിടിക്കുകയായിരുന്നുവെന്നും തലനാരിഴയ്ക്കാണ് നാനാ പടോലെ രക്ഷപ്പെട്ടതെന്നും കോണ്‍ഗ്രസ് ആരോപിച്ചു. അതേസമയം നേതാവിനെ കൊല്ലുകയെന്ന ഉദ്ദേശത്തില്‍ മനപൂര്‍വ്വം അപകടം സൃഷ്ടിച്ചതാണെന്ന് കോണ്‍ഗ്രസ് ആരോപിച്ചു.

തിരഞ്ഞെടുപ്പ് പ്രചാരണം കഴിഞ്ഞ് മടങ്ങവെയായിരുന്നു സംഭവം. അപകടത്തില്‍ ആര്‍ക്കും പരിക്കില്ല. ട്രക്ക് ബോധപൂര്‍വ്വം കാറിലേക്ക് ഇടിപ്പിക്കുകയായിരുന്നുവെന്ന് നാനാ പടോലെ ആരോപിച്ചു. അപകടത്തിന് പിന്നില്‍ ബിജെപിയാണെന്ന് കോണ്‍ഗ്രസ് ദേശീയ വക്താവ് അതുല്‍ ലോന്‍ഡെയും ആരോപിച്ചു.

പ്രതിപക്ഷ നേതാക്കളെ ഇല്ലാതാക്കിക്കൊണ്ട് തിരഞ്ഞെടുപ്പില്‍ ജയിക്കേണ്ട സാഹചര്യം ബിജെപിക്കുണ്ടോയെന്ന് അതുല്‍ ചോദിച്ചു. 'പൊതുജനങ്ങളുടെ അനുഗ്രഹം' അദ്ദേഹത്തോടൊപ്പമുണ്ടായിരുന്നതിനാല്‍ പട്ടോലെ പരിക്കില്‍ നിന്ന് രക്ഷപ്പെട്ടുവെന്നും അദ്ദേഹം പറഞ്ഞു. അതേസമയം ആരോപണത്തെ ബിജെപി പരിഹസിച്ചുകൊണ്ടാണ് പ്രതിരോധിച്ചത്.