മുംബൈ: മുംബൈ-ഗോരഖ്പൂർ ഗോദാൻ എക്‌സ്പ്രസിന് തീപിടിച്ചു. വെള്ളിയാഴ്ച ഉച്ചയ്ക്ക് നാസിക് റോഡ് റെയിൽവേ സ്റ്റേഷന് സമീപത്തുവച്ചാണ് തീപിടിത്തമുണ്ടായത്. ട്രെയിൻ ഉടൻ നിർത്തിയിടാനായതിനാൽ തീ നിയന്ത്രണവിധേയമാക്കാൻ കഴിഞ്ഞു. പെട്ടെന്നുള്ള തീപിടിത്തത്തിൻ്റെ കാരണം ഇതുവരെ കണ്ടെത്താനായിട്ടില്ല. സംഭവത്തിൽ ആളപായമില്ലെന്നതും ആശ്വാസകരമാണ്.

നാസിക് റോഡ് റെയിൽവേ സ്റ്റേഷനിൽ നിന്ന് പുറപ്പെട്ടതിന് തൊട്ടുപിന്നാലെ എസ്എൽആർ കോച്ചിൽ നിന്ന് പുക ഉയർന്നുവെന്നാണ് പ്രാഥമിക വിവരം. ശക്തമായ കാറ്റ് നിലനിന്നിരുന്നതിനാൽ നിമിഷങ്ങൾക്കകം കംപാർട്ട്മെൻ്റിൽ തീ ആളിപ്പടർന്നു. കോച്ചിന് തീപിടിച്ചതോടെ യാത്രക്കാർ പരിഭ്രാന്തിയിലായി. ട്രെയിൻ നിർത്താനായതിനാല്‍ യാത്രക്കാർ പെട്ടെന്ന് ഇറങ്ങി. അഗ്നിശമന സേനാംഗങ്ങളും റെയിൽവേ പൊലീസും റെയിൽവേ അധികൃതരും ഉടൻ സ്ഥലത്തെത്തി തീയണക്കുകയായിരുന്നു.