മലപ്പുറം: പൊന്നാനിയിൽ ജനങ്ങൾക്കൊപ്പം നിൽക്കുമെന്ന് പൊന്നാനിയുടെ ലീഗ് സ്ഥാനാർഥി അബ്ദുസമദ് സമദാനി. ഒരു തവണകൂടി ഇന്ന് കേന്ദ്രം ഭരിക്കുന്നവർ അധികാരത്തിലെത്തിയാൽ ഉണ്ടാകുന്ന ദുരന്തത്തിനെക്കുറിച്ച് രാജ്യസ്നേഹികൾക്ക് ആശങ്കയുണ്ടെന്നും അതുണ്ടാവാതിരിക്കാനുള്ള വഴിയാണ് ഈ തിരഞ്ഞെടുപ്പെന്നും അദ്ദേഹം റിപ്പോർട്ടറിനോട് പ്രതികരിച്ചു.

അബ്ദുസമദ് സമദാനിയുടെ വാക്കുകൾ

വളരെ ഗൗരവമുള്ള തിരഞ്ഞെടുപ്പാണ്. രാജ്യത്തിന്റെ ദിശ തിരഞ്ഞെടുക്കുന്ന തിരഞ്ഞെടുപ്പാണിത്. ഒരു തവണകൂടി ഇന്ന് കേന്ദ്രം ഭരിക്കുന്നവർ അധികാരത്തിലെത്തിയാൽ ഉണ്ടാകുന്ന ദുരന്തത്തിനെക്കുറിച്ച് രാജ്യസ്നേഹികൾക്ക് ആശങ്കയുണ്ട്. അതുണ്ടാവാതിരിക്കാനുള്ള വഴിയാണ് ഈ തിരഞ്ഞെടുപ്പ്. ഇന്ത്യക്ക് വേണ്ടിയുള്ള, ഭാവിക്ക് വേണ്ടിയുള്ള വോട്ടാണിത്. രാജ്യത്തങ്ങോളമിങ്ങോളം മതേതര ചേരി ശക്തമായി വരികയാണ്.

പാർലമെന്റിൽ എന്റെ മുൻഗാമികൾ നടത്തിയിട്ടുള്ള പോരാട്ടമുണ്ട്. മതേതരത്വത്തിനും, ന്യൂനപക്ഷാവകാശങ്ങൾക്കും ഇന്ത്യയെന്ന ആശയത്തിനും വേണ്ടി പ്രവർത്തിച്ചവരാണവർ. അത് മുറുകെപ്പിടിച്ചുകൊണ്ട് മുന്നോട്ടുപോകും. പൊന്നാനിയിൽ ജനങ്ങൾക്കൊപ്പം നിൽക്കും. ഞാൻ തെരുവുകളിലുണ്ടാകും.