മാനന്തവാടി: ജില്ലാ സ്പോർട്സ് കൗൺസിലും ജില്ലാ വോളിബോൾ ടെക്നിക്കൽ കമ്മിറ്റിയും ചേർന്ന് റിപ്പോർട്ടർ ചാനലിന്റെ സഹകരണത്തോടെ സംഘടിപ്പിക്കുന്ന സംസ്ഥാന സീനിയർ പുരുഷ-വനിതാ വോളിബോൾ ചാമ്പ്യൻഷിപ്പിന് ഇന്ന് വയനാട് മാനന്തവാടിയിൽ തുടക്കമാകും. ജനുവരി 1 മുതൽ 7 വരെ മാനന്തവാടി താഴെയങ്ങാടിയിൽ സജ്ജീകരിച്ച സ്റ്റേഡിയത്തിലാണ് മത്സരങ്ങൾ നടക്കുക.

റിമാൽ ഗ്രൂപ്പ്‌ ട്രോഫിക്ക് വേണ്ടിയും രാജേഷ് മണ്ണാപറമ്പിൽ മെമ്മോറിയൽ ട്രോഫിക്ക് വേണ്ടിയുമുള്ള ടൂർണമെൻ്റിൽ സംസ്ഥാനത്തെ 14 ജില്ലകളിൽ നിന്നുമുള്ള പുരുഷ-വനിത ടീമുകൾ പങ്കെടുക്കും. വിവിധ ജില്ലാ ടീമുകൾക്ക് വേണ്ടി കെഎസ്ഇബി, ബിപിസിഎൽ, കേരള പോലീസ് തുടങ്ങിയ ടീമുകൾ അണിനിരക്കും.

മന്ത്രിമാർ, MLA മാരായ ഒ ആർ കേളു, ടി സിദ്ധിഖ്, ഐ സി ബാലകൃഷ്ണൻ, ജില്ലാ കളക്ടർ ഡോക്ടർ രേണുരാജ് , മുൻ ഇന്ത്യൻ വോളി താരവും അർജുന അവാർഡ്‌ ജേതാവുമായ ടോം ജോസഫ്, ഇന്ത്യൻ ഫുട്ബോൾ ഇതിഹാസം ഐ എം വിജയൻ , റിപ്പോർട്ടർ ചാനൽ എം ഡി ആന്റോ അഗസ്റ്റിൻ, മുൻ ഇന്ത്യൻ വോളി കിഷോർ കുമാർ തുടങ്ങിയവർ ഉദ്ഘാടന ചടങ്ങിൽ പങ്കെടുക്കും.

വോളിബോൾ ചാമ്പ്യൻഷിപ്പിൽ പ്രമുഖരായ ഡിപ്പാർട്ട്മെൻറ് കളിക്കാരും കേരളത്തിനായി കളിക്കുന്ന നിരവധി സീനിയർ താരങ്ങളും പങ്കെടുക്കും.